Partitë mbajnë vetëm gjysmat e premtimeve, Gjokutaj: “Studimi tregon se ulin taksat por nuk arrijnë investimet për sektorët prioritarë!”
Për herë të parë në Shqipëri është matur mbajtja e premtimeve ekonomike të partive politike. Al-tax me mbështetjen e Ambasadës Amerikane ka publikuar studimin i cili mat llojin dhe realizimin e angazhimit zgjedhor për partitë më të mëdha në tre zgjedhjet e fundit. Përfundimi flet për premtime të mbajtura në më shumë se gjysmën e rasteve.
Një ndër problemet më të mëdha të klasës politike shqiptare është përgjegjshmëria e munguar ndaj premtimeve të pambajtura. Angazhimet ekonomike dhe financiare të një partie përbëjnë dhe gurin e themelit për të matur realizimin e premtimeve elektorale. Altax ka analizuar dhe matur premtimet e 3 fushatave të fundit elektorale dhe ka arritur në përfundimin se më pak se gjysma e premtimeve ekonomike arrijnë të prekin qytetarët.
“Kemi dy opsionet që janë masive. Kemi shtimin e alokimeve buxhetore sipas sektorëve në përqindje të GDP-së dhe kemi pjesën e uljes së taksave. Ndërsa kemi një rritje me kalimin e fushatave të premtimeve fiksale, të uljes së taksave, përgjithësisht politikat fiskale kanë një rritje të numrit të premtimeve, ndërsa premtimet e rritjes buxhetore janë treguar më të shtrënguar. Megjithatë ka një këmbëngulje në mbajtjen e përqindjeve fikse si përshembull shtimi i buxhetit për bujqësinë 5%, pavarësisht se është premtuar sistematikisht asnjëherë nuk është arritur. E njëjta gjë për Shëndetësinë edhe për arsimin.” – u shpreh Eduard Gjokutaj nga ALTAX.
Pikërisht sepse premtimet ekonomike janë më të matshme se tipet e tjera të premtimeve, subjektet zgjedhore kanë ditur të “përshtaten”.
“Shumë nga premtimet, politikanët janë të kujdesshëm që të mos i kuantifikojnë apo të mos i japin indikatori e duhur për ti bërë të mundur edhe monitorimin. Ose përdorin një fjalor evaziv ose përdorin një kufizim të përgjithshëm që në disa raste nuk të lejon të bësh një matje të saktë empirike, prandaj në shumë raste, votuesit udhëhiqen nga perceptime dhe opinionet e të tjerëve.” – u shpreh Elton Haxhi.
Ky studim vjen si një standard nga i cili nuk duhet të largohemi për zgjedhjet e Prillit dhe as për ato të ardhshme pasi mbajtja e premtimeve është mënyra më e mirë për të vlerësuar një politikan.
Enio Civici / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.