Partitë shqiptare dyfishojnë deputetët – Nga 15 deputetë në 2016, në 29. LSDM fiton, s`ka qeveri pa shqiptarët

LSDM e Zoran Zaev, nën logon e koalicionit “Mundemi” është fituesja e zgjedhjeve të përgjithshme të parakohshme në Maqedoninë e Veriut, me një epërsi mjaft të ngushtë me kundërshtarët e VRMO-DPMNE. Të dhënat zyrtare nga fqinjët, kur janë numëruar më shumë se 95% e votave, tregojnë se LSDM ka fituar 46 deputetë, opozita e VRMO-DPMNE, 44 deputetë, dhe dy grupimet e mëdha shqiptare, BDI, 15 deputetë, si dhe Aleanca për Shqipërinë, 12 deputetë.

PDSH ndërkohë ka marrë 1 deputet deri më tani. Po të llogarisim këtu edhe 4 deputetët e Lëvizjes Besa të cilët kanë garuar në listat e LSDM-së, atëherë numri i shqiptarëve në parlamentin e ri maqedonas fiksohet në 32, nga  120 vende. Në zgjedhjet e fundit, BDI kishte 10 deputetë, Aleanca për Shqipërinë, vetëm 3, ndërsa PDSH 2, si dhe lëvizja Besa, 5 deputetë. Pra, BDI dhe aleanca kanë dyfishuar numrin e deputetëve në parlamentin e vendit.

Rezultati i këtyre zgjedhjeve i garanton partitive shqiptare rolin e përcaktuesit të qeverisë së re. Asnjëra nga dy partitë kryesore nuk mund të krijojë qeveri të re pa partitë shqiptare. Gjatë mbrëmjes së të mërkurës ndërkohë, në të gdhirë të së Enjtes komisioni shtetëror i zgjedhjeve në Maqedoninë e Veriut u sulmua nga hackerat, siç deklaroi kreu i këtij komisioni, ç`ka shkaktoi edhe rënien e faqes online përkohësisht. Gjatë zgjedhjeve të kaluara, ato të vitit 2016, partitë shqiptare ngjitën Zoran Zaev në pushtet, pavarësisht se partia e tij kishte dalë e dyta në zgjedhje.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.