Pas 2 ftesave, Shqipëria pjesë e projektit ndërkombëtar për taksat! Shmanget kategorizimi si “jobashkëpunues” për vendin
Shqipëria ka vendosur të bëhet pjesë e nismës së vendeve të G20 dhe OECD-së që synon të adresojë dobësitë e sistemit ndërkombëtar të taksimit, që krijojnë mundësi për erozion të bazës së taksueshme dhe transferim të fitimeve (BEPS-Base Erosion Profit Shifting).
Projekti ndërkombëtar i miratuar në shtator të vitit 2013 nga liderët e G20 sëbashku me anëtarët e OECD-së, ka si synim arritjen e tre objektivave kryesorë:
- Përforcim të koherencës së rregullave të tatimit mbi të ardhurat e korporatave në nivel ndërkombëtar;
- Lidhjen e tatimit me përmbajtjen e aktiviteteve ekonomike të realizuara;
- Përmirësim të transparencës.
Në fakt, Shqipërisë i është bërë ftesë dy herë për t’u bërë pjesë e nismës. Në maj të vitit 2016 Shqipëria mori ftesë nga Sekretari i Përgjithshëm i Organizatës për Bashkëpunim dhe Zhvillim Ekonomik (OECD) për t’iu bashkuar kuadrit gjithëpërfshirës të projektit ndërkombëtar mbi erozionin e bazës së tatueshme dhe transferimin e fitimit. Ftesa e mësipërme u përsërit në datën 27 mars 2018.
“Me propozimin e këtij projektligji pranohet ftesa e Organizatës për Bashkëpunim dhe Zhvillim Ekonomik, me qëllim bërjen pjesë të Republikës së Shqipërisë në kuadrin gjithëpërfshirës të projektit ndërkombëtar BEPS. Kjo, dhe në përmbushje të angazhimit të Shqipërisë ndaj Komisionit Evropian, se vendi ynë do të jetë pjesë e kuadrit gjithëpërfshirës të projektit ndërkombëtar BEPS në vitin 2019.
Pjesëmarrja në këtë projekt është plotësim i kriterit thelbësor që Shqipëria të mos jetë në listën e vendeve të kategorizuara si jo bashkëpunuese nga Komisioni Evropian në fushën e bashkëpunimit ndërkombëtar për çështjet e taksave” shkruhet në relacion.
Pjesëmarrja në kuadrin gjithëpërfshirës të projektit ndërkombëtar mbi erozionin e bazës së tatueshme dhe transferimin e fitimit i jep mundësinë vendeve anëtare të punojnë në mënyrë të barabartë në trajtimin e shmangies tatimore, të përmirësojnë koherencën e rregullave të marrëveshjeve tatimore dhe të sigurojnë një ambient tatimor sa më transparent.
Duke qenë pjesë e kuadrit gjithëpërfshirës të projektit ndërkombëtar BEPS, vendet anëtare marrin angazhimin për sa i përket plotësimit të standardeve minimale të paketës BEPS, e cila në total përmbledh 15 plane veprimi. Kjo paketë i pajis shtetet pjesëmarrëse me instrumente vendase dhe ndërkombëtare për të adresuar shmangien e taksave, në mënyrë që fitimet të tatohen aty ku kryhen aktivitetet ekonomike që i gjenerojnë ato dhe aty ku krijohet vlera. Aktualisht janë 113 juridiksione anëtare të kuadrit gjithëpërfshirës të projektit ndërkombëtar BEPS.
“Pra, në përgjithësi vendet jo OECD / jo G20 (siç është dhe rasti i vendit tonë) mund të përfitojnë nga puna e përfshirë në “paketën BEPS” në përpjekjet e tyre për të luftuar shmangien e tatimeve.
Në zbatimin e masave të BEPS, ato gjithashtu mund të marrin mbështetje të koordinuar dhe më të orientuar për ndërtimin e kapaciteteve në zbatimin e rezultateve të BEPS-së nga organizatat ndërkombëtare dhe rajonale” vijon relacioni.
Sa i përket pjesëmarrjes në kuadrin gjithëpërfshirës të BEPS-së, Shqipëria duhet të paguajë një tarifë vjetore prej 20 mijë e 200 euro.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.