Pas një dekade, Ekonomiku rikthen doktoraturat – Kule: Do bëhen për nevoja konkrete të institucioneve e bizneseve. Nuk do flenë në arkiva

Pas një dekade të tërë, Fakulteti i Ekonomisë ka nisur procesin e dhënies së doktoraturave. Por, sipas Dekanit të këtij Fakulteti Dhori Kule, kësaj here nuk do bëhet më fjalë për studime shkencore të destinuara për të mbetur nëpër arkiva, por për kërkime të mirëfillta shkencore në shërbim të biznesit e të administratës shtetërore.

Në ceremoninë e prezantimit të 119 kandidatëve fitues për të ndjekur studimet e Ciklit të Tretë, Doktoratë në Shkencat Ekonomike, Kule tha se rreth gjysma e tyre i përkasin institucioneve publike e bizneseve.

Ai tha se janë një seri institucionesh shtetërore e biznesesh private që i janë drejtuar Fakultetit ekonomik për studime të mirëfillta shkencore për nevoja konkrete.

Universitetet Publike kanë bllokuar që prej vitit 2013 ciklin e tretë të studimeve, kur mazhoranca socialiste e konsideroi procesin me shumë të meta e shumë prej fakulteteve pa kapacitetet e nevojshme për garantimin e cilësisë së tyre.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.