Pas pensionistëve, radha e të rinjve. Media italiane: A mund të jetë Shqipëria zëvendësuesja e Gjermanisë e Anglisë? 

Gjithnjë e më shumë në shtypin italian po merr vëmendje Shqipëria, tashmë jo për emigrantët shqiptarë që janë atje, por për ata italianë që vijnë këtu. Disa vite më parë, është analizuar vazhdimisht fenomeni i njohur si “turismo dei pensionati” apo turizmi i pensionistëve, ku pensionistët italianë me të ardhurat nga pensioni duke mos përballuar jetesën në Itali drejtoheshin në vendet afrikane ku me ato pak para nga pensioni bënin një jetesë të mirë për shkak të kostos së ulët të jetesës. Po ashtu, për shkak të klimës, me të ardhurat nga pensioni ata praktikisht bënin pushime të zgjatura në zonat bregdetare.

Por mesa duket, vitet e fundit është Shqipëria ajo që po merr gjithnjë e më shumë këtë “treg”. Për shkak të afërsisë gjeografike e kushteve klimatike, Shqipëria është parë në vitet e fundit si një alternativë për pensionistët italianë.

Por ndërsa fenomeni i pensionistëve duket i “kaluar”, në Itali tashmë ka diskutime edhe për fenomenin e të rinjve që gjithnjë e më shumë po zgjedhin Shqipërinë për të nisur aktivitete ekonomike.

“Bergamonews” analizon këtë fenomen, duke evidentuar se numri i italianëve që jetojnë në Shqipëri po rritet ndjeshëm. Artikulli analizon shkaqet e transferimit të pensionistëve e të rinjve italianë në Shqipëri.

Artikulli në shqip:  

“Shqiptarët gjithçkabërës nisën të mbërrijnë e të sistemohen edhe në provincën e Bergamos, ku tashmë ka një komunitet nga vendi i shqiponjave. Të dhënat e INSTAT lënë të kuptohet se ka një ulje të ardhjeve të shqiptarëve në Bergamo por sot ajo që të mahnit më shumë është numri në rritje i italianëve, mbi të gjithave, e pensionistëve që transferohen  pikërisht në Shqipëri, vendin që për ta ka qenë gjithnjë pjesë e botës së tretë: 20 mijë është shifra e komunitetit tonë në vendin e shqiponjave.

Cilat janë arsyet e vërteta që i shtyjnë të spostohen në këtë zonë të Ballkanit?

Mbi të gjitha është kostoja e jetës që është dukshëm më pak e kushtueshëm se ajo në Itali, ndaj një pension i thjeshtë mund të jetë i mjaftueshëm për të bërë një jetë më dinjitoze.

Një pikë tjetër mjaft e rëndësishme në këtë zgjedhje të veçantë është niveli i ulët i taksave në krahasim me atë në Itali: 10% barra fiskale krahasuar me 70% që është në Itali. Përveç kësaj, nga një studim i fundit, rezulton se edhe faktori klimatik ndikon në vendimin për t’u zhvendosur në këtë zonë.

Por a janë vetëm pensionistët ata që transferohen në Shqipëri?

Në fakt, JO; në këtë periudhë rezulton se është rritur numri i të rinjve, edhe të atyre nga provinca e Bergamos, që vendosin të bëjnë një sipërmarrje. Është lajm i publikuar së fundmi që 600 biznese start-up të Tiranës janë në pronësi të të rinjve italianë që dukshëm nuk kanë arritur të gjejnë hapësira në tregun e vendit të tyre. Restorante, piceri, pube; këto janë vetëm disa prej aktiviteteve që udhëhiqen nga italianët në këtë vend të vogël të Ballkanit.

Pse? Mbase jo të gjithë e dinë se Shqipëria po del në pah posaçërisht si rrjedhojë e peizazheve mahnitëse që mesa duket, tërheqin shumë turistë kuriozë për zbulimin e bukurive të fshehura të vendit. Dhe është pikërisht sektori i lidhur me aktivitetin turistik ku gjejmë një përfshirje të dukshme të italianëve. Mund të jetë Shqipëria, zëvendësuesja e shteteve si Gjermania e Anglia? Mbase është shumë herët, por faktet flasin qartë: ky vend po rritet e perspektiva për të ardhmen janë dukshëm të mira”.

Për artikullin e plotë klikoni këtu.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.