‘Pasaportat e arta’/ Bullgaria kërkon t’i japë fund praktikës së ‘nënshtetësisë kundrejt investimeve’!
Qeveria e re e Bullgarisë miratoi të mërkurën një projekt-ligj që synon të ‘heqë qafe’ “pasaportat e arta”, një program që lejon njerëzit të bëhen shtetas në këmbim të investimeve të mëdha. Komisioni Europian ka shprehur vazhdimisht shqetësimin për këtë praktikë dhe ka nisur procedurat e shkeljes kundër Maltës dhe Qipros për këtë.
Ai konsideron se paraqet rreziqe për BE-në, të cilat “në veçanti lidhen me sigurinë, pastrimin e parave, evazionin fiskal dhe korrupsionin”. Në qershor 2021, Brukseli u dërgoi një letër autoriteteve bullgare duke u kërkuar atyre që të shfuqizojnë pasaporta të tilla ‘komode’.
Të huajt që investojnë shumën minimale prej një milion leva (500,000 euro) mund të marrin një titull rezidenti të përhershëm. Për dyfishin e kësaj, ata mund të marrin shtetësinë pa kaluar nëpër fazat më të lodhshme të një procedure tradicionale. Por qeveria zbuloi parregullsi në 47 raste, pothuajse gjysma e totalit.
Ministria e Drejtësisë përmend në veçanti shembullin e investitorëve që kanë rishitur tituj ose një pronë të fituar së fundmi menjëherë pas natyralizimit të tyre. Kabineti i kryeministrit Kiril Petkov, i cili ka qenë në detyrë që nga mesi i dhjetorit, tha se do t’i jepte fund praktikës për shkak të “mungesës së investimeve reale në ekonomi, që mund të çojë në krijimin e vendeve të punës”.
Projektligji, i mbështetur nga një pjesë e madhe e klasës politike, ende nuk është miratuar nga parlamenti.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.