Pasiguri brenda BQE – Nuk dihet ç`do të ndodhë më 20 korrik

Brenda Bankës Qendrore Europiane duket se nuk ka shumë harmoni. Pavarësisht se, zyrtarisht Mario Draghi dhe drejtues të tjerë të lartë të institucionit kanë apeluar vazhdimisht për kujdes në normalizimin e politikave monetare, disa ligjbërës të institucionit duket se nuk janë dakord me të.

Madje, sinjalet e para mund të vijnë që në takimin e këtij muaji, thonë disa burime të ndryshme. 6 guvernatorë të bankave qendrore të Eurozonë janë shprehur së fundmi, se janë të demoralizuar nga rritja e euros dhe e titujve qeveritarë pas fjalëve të Mario Draghit javën e kaluar.

Madje ata kanë dyshime të mëdha sa i përket sinjalizimit të ndërhyrjes në Korrik. Ligjbërësit i druhen impaktit që mund të ketë një lëvizje e tillë në rimëkëmbjen e ekonomisë.  Ekspertët ndërkohë shprehen se, gjithçka do të varet nga reagimi i tregjeve deri më 20 Korrik, kur do të mblidhet edhe bordi drejtues i bankës, për të vendosur ecurinë e politikave monetare.

Por, deri më tani sinjalet nuk janë aspak pozitive. Euro vijon të qëndrojë pranë niveleve rekord të larta, që nuk është aspak një lajm i mirë për institucionin. Tashmë, askush nuk është i sigurt se ç`do të ndodhë në takimin e 20 Korrikut, as vetë anëtarët e bordit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.