Pasiguritë nga Trump ngadalësojnë rezervimet e udhëtimeve drejt SHBA
Kërkesa për të udhëtuar drejt Shteteve të Bashkuara për muajt në vijim ka patur rënie, pas nisjes mjaft pozitive në fillim të vitit.
Sipas kompanisë ForwardKeys, e cila analizon 16 milionë rezervime fluturimesh në ditë, thotë se edhe fluturimet nga Lindja e Mesme drejt SHBA dhe anasjelltas janë goditur prej vendimit të Trump për të ndaluar hyrjen e njerëzve nga shtatë vende me shumicë myslimane.
“Mbizotëron pasiguria, ndërsa retorika presidenciale duket se po tkurr vizitorët në SHBA”, thotë themeluesi i kësaj kompanie, Olivier Jager.
Pasi u vendos ndalimi i udhëtimit, fluturimet ndërkombëtare drejt SHBA ranë me 6.5 për qind në tetë ditët në vijim.
Sipas raporteve të ForwardKeys, trendi i prenotimeve u normalizua pasi gjykatat shpallën ndalimin të paligjshëm, por prenotimet ranë përsëri nëntë ditë më vonë kur u lajmëruan planet për një ndalim të ri udhëtimi.
Kërkesa për udhëtim drejt SHBA pritet të jetë edhe qendra e vëmendjes në panairin e udhëtimit më të madh në botë në Berlin këtë javë. Gjithsesi, gjermanët, të cilët janë ndër udhëtarët që shpenzojnë më tepër, nuk janë ndikuar nga ndryshimet e Trump. Sipas të dhënave për të njëjtën periudhë rezulton se kërkimet për fluturime drejt SHBA janë rritur me 10 për qind.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.