Pastrimi i parave, gjoba ndërtuesve – Shkelje procedurash nga 6 kompani ndërtimi

Ligjit për parandalimin e pastrimit të parave nuk i kanë shpëtuar as kompanitë e ndërtimit.

6 shoqëri ndërtimi mjaft të njohura në vend, mes të cilëve edhe një resort turistik, janë gjobitur nga Drejtoria e Përgjithshme e Parandalimit të Pastrimit të Parave për mosrespektim të procedurave të raportimit të rasteve të dyshimta.

Shoqëritë i kanë kundërshtuar gjobat dhe kanë ngritur padi kundër kësaj Drejtorie në Gjykatën Administrative.

Televizioni SCAN disponon paditë e ngritura nga shoqëritë e ndërtimit për gjobat që nisin nga 1 milion lekë.

Sektori i ndërtimit është një prej më të ekspozuarve kur vjen fjala te pastrimi i parave. Jo vetëm Drejtoria e Përgjithshme e Parandalimit të Pastrimit të Parave, por edhe Policia e Prokuroria janë shprehur se një pjesë e mirë e parave të ardhura nga krimi kanalizohen në ndërtimin e hoteleve e resorteve turistike.

Plot 184 raste të dyshimta për pastrim parash kanë raportuar përgjatë vitit 2016 institucionet shtetërore. Të dhënat zyrtare tregojnë se Zyra e Regjistrimit të Pasurive të Paluajtshme raportoi 134 raste gjatë vitit të kaluar duke treguar edhe një herë trendin që ka pasur ndër vite investimi i parave që vijnë nga aktivitetet kriminale.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.