Pastrimi i parave, në sitë noterët e agjencitë e pronave – Adea Pirdeni: Shtohet kontrolli ndaj profesioneve të lira, gjurmim jashtë kufijve

Ministria e Drejtësisë paralajmëron shtim të kontrollit ndaj profesioneve të lira në kuadër të masave për parandalimin e pastrimit të parave. Po ashtu, pjesë e nismës është edhe gjurmimi jashtë kufijve i transaksioneve të dyshimta.

Lufta kundër pastrimit të parave do të thellohet përmes ndjekjes së transaksioneve të dyshimta e letër-prorosive me partnerët e huaj, por edhe përmes shtimit të kontrollit në vend veçanërisht sa i përket profesioneve të lira.

Zëvendësministrja e Drejtësisë Adea Pirdeni ka paraqitur këtë të mërkurë plan-veprimin e Qeverisë në luftën kundër pastrimit të parave, i cili parashikon një seri ndryshimesh ligjore, gjurmim në kohë reale të transaksioneve të dyshimta e shtim të kontrollit ndaj institucioneve jofianciare.

Profesioni i noterëve dhe ai i ndërmjetësve të pasurive kanë qenë dy prej atyre ndaj të cilësive është shtuar më së shumti vëmendja.

Deklaratat e Pirdenit u bënë gjatë Forumit për parandalimin e pastrimit të parave të organizuar nga Instituti për Demokraci dhe Ndërmjetësim, i cili mblodhi përfaqësues të shoqërisë civile, medias investigative, rretheve akademike, shoqatave të sektorit privat si dhe përfaqësues të institucioneve publike.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.