Pastrimi i parave – Rama mbledh komitetin, në 2016 u bllokuan 29 mln euro
Drejtoria e Përgjithshme e Parandalimit të Pastrimit të Parave raportoi se në vitin 2016 janë bllokuar rreth 29 milionë euro të dyshuara si të ardhura nga aktiviteti kriminal.
Për ngrirjen apo bllokimin e tyre janë lëshuar 61 urdhëra administrative ndërkohë që në viti 2015 u bllokuan rreth 16 milionë euro përmes 47 urdhërave administrativë. Të dhënat u raportuan në Mbledhjen e Komitetit të Bashkërendimit të Luftës kundër Pastrimit të Parave nën drejtimin e Kryeministrit Edi Rama.
Të pranishëm në mbledhje ishin edhe Ministri i Financave, Ministri i Punëve të Jashtme, Ministrja e Mbrojtjes, Zv.Ministri i Punëve të Brendshme, Ministri i Drejtësisë, Prokurori i Përgjithshëm, Guvernatori i Bankës së Shqipërisë, Zv.Drejtori i SHISH dhe Inspektori i Përgjithshëm i ILDKPKI.
Komiteti mori në analizë aktivitetin e Drejtorisë së Parandalimit të Pastrimit të Parave ku të paktën për vitin e kaluar u theksua se kemi një rritje të numrit të rasteve të dyshimta të dërguara në institucionet ligj zbatuese Polici dhe Prokurori.
“Në tre vitet e fundit janë bllokuar 56 milionë Euro në llogaritë bankare të personave të dyshuar, shumë kjo që përfaqëson një rritje të pakrahasueshme me gjithë periudhën e mëparshme të funksionimit të këtij institucioni për 13 vite së bashku, kur ishin bllokuar gjithsej 8 milion Euro”, vlerëson raporti.
Komiteti vendosi në fund që të rishikojë rregulloren e vitit 2004 për koordinimin ndërinstitucional lidhur me vlerësimin e riskut dhe minimizimin e fenomenit.
Nertila Maho/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.