Pastrimi i parave, shtohen 20% procedimet – Prokuroria e Përgjithshme: 279 hetime por pak në gjykatë, problem Kadastra dhe Pandemia

Prokuroria e Përgjithshme raporton një rritje me 20% të procedimeve për veprat penale që kanë të bëjnë me pastrimin e parave gjatë vitit të shkuar, ndërkohë që problem në zbardhjen e tyre janë mungesa e aksesit në Kadastër. Scan ka zbardhur të dhënat zyrtare të Prokurorisë së Përgjithshme, sipas së cilës ka pasur rritje të efektivitetit në  hetimet  për  veprat  penale  të  pastrimit  të  parave  të  parashikuara  nga  nenet  287  e  287/b  të  Kodit  Penal.

Për  këto  dy  vepra  në  vitin  2020  krahasuar me vitin 2019 ka rritje  20.1 % të numrit të procedimeve dhe 102 % të numrit të pandehurve të regjistruar, ndërsa rritja 11 % e numrit të personave të dënuar i përket veprës penale të pastrimit të  parave sipas nenit 287 të K.Penal.  -Në  këtë  vështrim,  gjatë  vitit  2020  për  veprën  penale  “Pastrimi  i  produkteve  të  veprës  penale  ose  veprimtarisë  kriminale”  të  parashikuar  nga  neni  287  i  Kodit  Penal,  janë  regjistruar  279  procedime,  me  65  të  pandehur,  prej  të  cilëve  17  procedime,  me  30  të  pandehur  janë  dërguar  për  gjykim,  ose  krahasuar  me  vitin    2019  me  rritje  20,2 %  të  procedimeve dhe 103,1 % e të pandehurve të regjistruar.

Ndërkohë që në raport fajësohet Pandemia si dhe mungesa e aksesit të prokurorëve në regjistrat e Kadastrës për numrin e pakët të procedimeve të dërguara për gjykim.

Në shifrat e ulëta, si të numrit të çështjeve  dhe  të  pandehurve  të dërguar  për  gjykim,  ashtu  dhe  të  numrit  të  gjykuarve,  ka  ndikuar dhe gjendja e pandemisë Covid-19, thekson raporti.

Ndërkaq, lidhur me verifikimet e pasurive të paluajtshme, organi i akuzës pretendon se ajo  duhet  ti  shlyejë  drejtorisë  vendore  të  ASHK-së,  çdo  muaj,  shumën  e  tarifave  të  shërbimeve  kadastrale  të  ofruara në favor të tyre gjatë muajit paraardhës.-Në  këtë  vështrim,  prokuroritë  nuk  kanë  akses  elektronik  të  drejtpërdrejtë,  por  kanë akses  të  kufizuar  në  të  dhënat  e  ASHK-së, parashikime në  këtë  vendim  të  KM  që  kanë  penguar dhe po pengojnë prokurorët dhe jo vetëm, në përmbushjen e funksioneve ligjore të tyre, për hetimin dhe ushtrimin e ndjekjes penale të autorëve të dyshuar të veprave penale dhe hetimin e pasurive/aseteve të dyshuara që mund të jenë administruar dhe regjistruar në ASHK, që përfaqësojnë të ardhura të dyshuara nga veprimtaria kriminale për sekuestrimin dhe/ose konfiskimin e tyre sipas ligjit.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.