Pastrimi i vendit nga ndotjet – Klosi: Aksioni i përbashkët më MASR nis në datë 24 nëntor
Më 24 nëntor nis aksioni vullnetar për pastrimin e Shqipërisë. Në aktivitetin e zhvilluar me këtë rast, Ministri i Turizmit dhe Mjedisit, Blendi Klosi si edhe zëvendësministri i Arsimit, Rinisë dhe Sportit, Shpati Kolgega, konfirmuan bashkëpunimin jo vetëm për pastrimin e territorit, por edhe për edukimin e brezave për ta mbajtur pastër atë. Klosi bëri të ditur se ky aksion do të nisë me pastrimin e 9000 objekteve të evidentuara tashmë si të ndotura dhe do të vazhdojë në të gjithë vendin për 6 muaj, duke siguruar një Shqipëri të pastër për sezonin e ardhshëm turistik.
“Kanë evidentuar jo pak, por 9 mijë objekte që mund të pastrohen. 9 mijë në të gjithë Shqipërinë janë targeti jonë në këtë aksion të parë për të vazhduar më pas në 6-mujorin që do të vijë. Prandaj na del detyrë që jo vetëm të pastrojmë Shqipërinë në një aksion të madh, por data 24 nëntor të jetë dita e parë ku ne fillojmë këtë aksion 6-mujor për të pastruar Shqipërinë nga papastëritë, por po ashtu edhe thelbi i gjithë përpjekjes tonë do të jetë pastrimi i Shqipërisë nga prodhuesit e papastërtive”, u shpreh Klosi.
Kolgega ofroi mbështetje për këtë aksion duke siguruar edhe pjesëmarrjen në mënyrë vullnetare të shkollave dhe universiteteve.
“Gatishmëria jonë nuk është vetëm në këtë rast por do të jetë e përhershme dhe konstante, jo vetëm në fushata të tilla, por gjithashtu duke kontribuar në edukimin e brezave të ardhshëm në përgatitjen dhe formimin e tyre në mënyrë që në të ardhshmen çdo qytetar i ri shqiptar që del nga bankat e shkollës të jetë i edukuar edhe me aspektin e mbajtjes pastër të mjedisit”, tha zv/ministri Kolgega.
Këtij aksioni 6-mujor i janë bashkuar rreth 150 mijë vullnetarë si edhe shoqata Green Albania.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.