Pasuria shkarkon Donika Prelën. Apeli i Vetting-ut jep vendimin për ish-Prokuroren e Krimeve të Rënda: S’justifikon pronat

Ka përfunduar me vendim përfundimtar për shkarkim nga detyra seria e gjatë e seancave të ish kreut të Prokurorisë së Krimeve të Rënda Donika Prela.  Kolegji i Posaçëm i Apelimit vendosi të premten të rrëzojë vendimin e shkallës së parë të Vetting-ut e cila në maj të vitit 2019 e konfirmoi në detyrë. Apeli njohu si të drejtë ankimimin e Komisionerit Publik, I cili kërkoi shkarkimin nën justifikimin se Prela nuk justifikon me burime të ligjshme financiare pronat familjare.

Ndërkohë që jo pa diskutime erdhi edhe konfirmimi i saj në detyrë nga shkalla e parë e Vetting. Karriera e saj u vu në diskutim nga Komisioni i Pavarur i Kualifikimit për shkak të disa pikëpyetje që lindnin nga pasuritë dhe të ardhurat familjare.

Asaj ju desh të jepte shpjegime shpjegime veçanërisht për të ardhurat e bashkëshortit inxhinier, i cili kishte mungesë të kontributeve të sigurimeve shoqërore dhe taksave për disa vite. Prokurorja Argumentoi se ishte firma ku kishte punuar bashkëshorti ajo që nuk kishte shlyer detyrimet, dhe paraqiti prova se ai kishte marrë rregullisht paga prej saj për një periudhë të gjatë kohore.

Ndërkaq, ajo kishte deklaruar 32 mijë euro blerjen e një apartamenti prej 95 metrash katrorë në Tiranë, si dhe 1.4 milionë lekë blerjen e një apartamenti 59 metra katrorë në Durrës.  Që të dy apartamentet ishin shitur më pas nga Prokurorja për shifra shumë më të larta, përkatësisht 80 mijë euro dhe 4 milionë lekë.  Pikëpyetje ngrinte edhe sipërfaqja e tokës prej 1 mijë metrash katrorë e blerë në Petrelë për 350 mijë lekë.  Por Prela argumentoi se dy apartamentet ishin blerë nga bashkëshorti i saj në firmën ku punonte me çmim preferencial, praktikë kjo e zbatuar nga kompania edhe për punonjës të tjerë. Sa për tokën në Petrelë, Gjykimi i Prelës, e cila nuk u paraqit të premten në Kolegjin e Posaçëm të Apelimit zgjati disa seanca, duke qenë se Prokurorja e njohur kërkoi shkarkimin e dy gjyqtarëve, Ina Ramës dhe Natasha Mulajt, për konflikt interesi.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.