Pasuritë e krimit, OFL dërgohet në Kushtetuese – Kërkohet rrëzimi i Aktit Normativ të Qeverisë përmes të cilit u bllokuan 500 prona

Operacioni Forca e Ligjit, përmes së cilës u bllokuan rreth 500 pasuri të luajtshme e të paluajtshme, ka përfunduar në Gjykatën Kushtetuese. Ka qenë një prej 255 subjekteve që u detyruan nga kjo nismë të deklarojnë pasuritë që ka dërguar çështjen në Gjykatën Kushtetuese. Bëhet fjalë për Edlir Hysenaj, i cili përmes avokatit të tij kërkon shfuqizimin si të papajtueshëm me kushtetutën të vendimit të dhënë ndaj tij, si subjekt i deklarimit të pasurisë.

Ndër argumentet për rrëzimin e OFL-s dhe shpalljen e saj antikushtetuese janë mungesa e emergjencës për të nxjerrë Aktin Normativ si dhe zgjatjen e afatit edhe pas mbarimit të mandatit të saj më 31 dhjetor 2020.

Gjykata e shqyrtoi padinë të martën në seancë plenare, dhe u tërhoq për të marrë vendim. Bëhet fjalë për aktin Normativ nr.1, të datës 31 janar të vitit 2020 “për masat parandaluese në kuadër të forcimit të luftës kundër terrorizmit, krimit të organizuar, krimeve të rënda dhe konsolidimit të rendit e sigurisë publike”.

Operacioni Forca e Ligji u vu në zbatim nga Qeveria gjatë vitit 2020, duke detyruar qindra persona të përfshirë në aktivitet kriminale të deklaronin pasuritë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.