Pasuritë e krimit, rekord sekuestrimesh – 2021, bllokohen në total 72 milionë dollarë pasuri me burime të paligjshme
Viti 2021 ka shënuar një vlerë record pasurish të konfiskuara apo sekuestruara të krimit e korrupsionit. Scan Televizion ka zbardhur të dhënat zyrtare të Agjencisë së Administrimit të Pasurive të Sekuestruara e të Konfiskuara për vitin e shkuar, një pjesë e mirë e të cilave I detyrohen Operacionit Forca e Ligjit të zbatuar në vitin 2021. Agjencia raporton se gjatë vitit 2021 janë marrë në administrim 399 pasuri, nga të cilat:
Të sekuestruara 327 pasuri me një vlerë të përafërt prej 7,2 miliardë lekësh, afërsisht 72 milionë dollarë.
Të konfiskuara rezultojnë 48 pasuri me një vlerë të përafërt prej 508 milionë lekësh, afërisht 5 milionë dollarë. Listës I shtohen edhe provat materiale të konfiskuara, ku përfshihen 24 pasuri me një vlerë të përafërt prej 1,8 milionë lekësh. Të revokuara rezultojnë 31 pasuri me një vlerë të përafërt prej 574 milionë lekësh apo rreth 5 milionë dollarësh.
Vlera të larta pasurish të konfiskuara e të sekuestruara raportohen edhe për vitin 2020. Sipas Agjencisë, bëhet fjalë për 402 pasuri të sekuestruara në total, me një vlerë prej rreth 5,6 miliardë lekësh, apo afërisht 56 milionë dollarë. Ndërsa numri i pasurive të konfiskuara është 64 me një vlerë prej 490 milionë lekësh, afërsisht 4.9 milionë dollarë.
Bie në sy se disa prej pronave gjenden në zona mjaft të kërkuara të bregdetit, ndërkohë që nuk mungojnë as ato në Kryeqytet, madje edhe në disa prej zonave luksoze në qendër apo periferi të Tiranës. Lista përfshin apartamente, dyqane, toka arë apo troje për ndërtim, ndërkohë që nuk mungojnë as bizneset, madje edhe hotele me vlera miliona euro
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.