Paundi s’ka prekur ende fundin – Mund të bjerë në $1.17, nëse nuk ka marrëveshje për Brexit
Paundi britanik nuk ka prekur ende fundin, ndërkohë që shanset e Britanisë për të dalë nga Bashkimi Europian pa marrëveshje janë shtuar përsëri.
Kryeministri Boris Johnson, që ishte imazhi i fushatës së daljes nga Europa në referendumin e vitit 2016, ka thënë vazhdimisht se do të nxjerrë Britaninë më 31 Tetor, qoftë edhe pa marrëveshje. Paundi preku nivelin më të ulët që prej fillimit të 2017-ës në nisje të muajit Gusht. Përpara se të vijë data e divorcit, paundi ka ende vend për të rënë dhe mund të tregtohet në segmentin 1.17-1.2 dollarë, sipas një sondazhi të Reuters drejt analistëve të këmbimit valutor.
Britania pritej të dilte fillimisht në fund të muajit Mars, por data është shtyrë që prej atëherë. Sipas sondazhit, shanset e daljes pa marrëveshje nga Europa janë rritur në muajin Gusht në 35%, nga 30% që ishin në Korrik. Analistët thonë se është e vështirë të parashikohet se çfarë do të bëjë qeveria e Johnson. Versioni me më pak gjasa është që Britania të qëndrojë anëtar në Zonën Ekonomike Europiane, ku paguan drejt buxhetit të Bashkimit Europian për të fituar akses në tregun e përbashkët.
Nëse arrihet marrëveshja tregtare, analistët presin një rritje të paundit në 1.27 dollarë në 6 muaj dhe në 1.33$ pas një viti.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.