PD në Pogradec – Basha: Ekonomia është rrënuar në katër vite
Kreu i opozitës ka patur si kryefjalë të fushatës së tij ekonominë. Edhe nga qyteti i Pogradecit, Basha është ndalur në rrënimin që ka pësuar ekonomia sipas tij në katër vite. Republika e Re është ajo që do të trajtojë qytetarët e Shqipërisë si të gjithë qytetarët e tjerë të Europës.
Ndërkohë që Basha ka kërkuar që të jenë qytetarët ata që do ta bindin Ramën që të zhvillojë një debat me të, për të ballafaquar programet dhe platformat.
“Mbrëmë e refuzoi debatin me mua. Pse e refuzon? Ka frikë? Unë nuk do ta sulmoj fizikisht. Çfarë frike ka? I dalin të palarat, se bilanc nuk ka, 300 mijë vende pune nuk i hapi, shëndetësinë e la në pikiatë. Nuk do debatin dhe e ka kthyer fushatën në shfaqje, vetëm me çështjet që iu interesojnë njerëzve nuk merret. Ndaj i them të mos ketë frikë, të përballet, thojani edhe ju kur të vijë këtu në Pogradec”, u shpreh kryetari i PD-së.
Basha nuk ka harruar të përmend edhe një herë subvencionet që ka premtuar për fermerët. Sipas tij, 100 milionë euro në vit për bujqësinë do të bëjnë që prodhimet vendase të konkurojnë denjësisht me ato të huaja.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.