PD, përzgjedhja e kandidatëve për deputetë. Të hënën nis punën komisioni i vlerësimit në Partinë Demokratike
Ditën e hënë, nis punën Komisioni i Vlerësimit të Kandidatëve për deputetë në Partinë Demokratike . Kjo pas mbylljes së afatit më 25 korrik për përzgjedhjen e tyre nga anëtarësia e kësaj partie.
Demokratët gjatë gushtit do të vijojnë procesin e përzgjedhjes së kandidatëve, finalizimin e programit qeverisës dhe përgatitjes së strukturave për zgjedhjet. Ky muaj parashikohet të jetë mjaft aktiv për opozitën pasi duke nisur që nga dita e hënë pritet të nisë punën edhe Komisioni i Vlerësimit të Kandidatëve të përzgjedhur deri më 25 korrik nga anëtarësia e kësaj partie. Ky komision do të ketë 5 persona në përbërjen e tij dhe do të asistohet nga Sekretariati ndihmës i Komisionit i përbërë nga dy persona.
Komisioni i Vlerësimit,do të bëjë seleksionimin e kandidatëve të propozuar për deputetë. Dy emra janë bërë publik deri më tani ai i Genc Rulit dhe Besnik Mustafajt, të cilët do të jenë pjesë e këtij procesi, ndërsa propozimet e tjera ende nuk janë bërë publike, por Komisioni është konceptuar që të ketë në përbërje jo vetëm ish-drejtues të lartë të PD. Nga procesi i propozimit të emrave, i cili zgjati më shumë se një muaj, janë identifikuar një numër i lartë kandidatësh në të gjithë qarqet, ku krahas emrave të njohur, ka shumë emra jashtë strukturave të partisë, kryesisht akademike por edhe individë që vijnë nga radhët e shoqërisë civile. Pas përzgjedhjes nga Komisioni i vlerësimit kandidatët pritet të votohen më pas edhe nga anëtarësia e Partisë Demokratike me qëllim përzgjedhjen e ekipit, me qëllim fitoren në zgjedhjet e ardhshme parlamentare .
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.