PE, rezolutë për hapjen e negociatave: “Refuzimi i BE mund të afrojë vende të tjera në Ballkan”
Në një rezolutë të miratuar të enjten, Parlamenti Europian thekson se Shqipëria dhe Maqedonia e Veriut i përmbushin kërkesat për të filluar negociatat për anëtarësim. Gjithashtu, Parlamenti shprehu zhgënjim të madh mbi dështimin për të hapur negociatat për pranim në Bashkimin Europian në samitin e 17 dhe 18 tetorit.
Teksti u miratua me 412 vota pro, 136 kundër dhe 30 abstenim. Eurodeputetët shprehin keqardhje për veprimin e Francës, Danimarkës dhe Holandës për të bllokuar vendimin dhe shprehen se Shqipëria dhe Maqedonia e Veriut kanë bërë përpjekje të konsiderueshme gjatë viteve të fundit dhe plotësojnë kriteret e BE për të filluar bisedimet e anëtarësimit.
Duke vlerësuar përpjekjet e Maqedonisë së Veriut për të zgjidhur çështje të vështira me vendet fqinje, eurodeputetët vlerësojnë edhe reformën në drejtësi në vendin tonë. Parlamenti thekson se refuzimi nga liderët e BE-së është një gabim strategjik, që do të dëmtojë kredibilitetin e Bashkimit Europian dhe dërgon një mesazh negativ për vendet e tjera kandidate.
Deputetët europianë paralajmërojnë se kjo mund të lejojë që aktorë të tjerë të huaj, veprimtaria e të cilëve mund të mos jetë në përputhje me interesat dhe vlerat e Bashkimit Europian, të angazhohen më shumë në Shqipëri dhe Maqedoninë e Veriut.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.