Peleshi: Konsumoni qumështin e nënproduktet e fabrikave shqiptare, janë të sigurta! Sfidë baxhot e zonave të largëta

Ministri i Bujqësisë dhe Zhvillimit Rural, Niko Peleshi u ka kërkuar të gjithë konsumatorëve të konsumojnë produktin shqiptar, pasi sipas tij ky produkt, është plotësisht i garantuar dhe brenda standardeve të sigurisë ushqimore. Bëhet fjalë për produktin e qumështit të fabrikave të mëdha shqiptare të industrisë ushqimore, i cili tregtohet në njësitë tona tregtare, si supermarkete dhe markete të liçensuara. Këtë deklaratë ministri e ka bërë gjatë vizitës në nëj stabiliment përpunimi qumështi dhe nënprodukteve të tij.

Ministri është shprehur se ai do të jetë i vendosur të mbështesë këto investime serioze, të cilat tashmë e kanë kaluar sfidën e tyre, për të furnizuar tregun me produkte të sigurta dhe plotësisht brenda normave dhe standardeve të kërkuara, duke u bazuar dhe garantuar në një sistem të mirëfilltë të gjurmueshmërisë, me ndihmën e teknologjisë së avancuar.

“Një gjurmueshmëri, e cila sot është detyrim ligjor për t’u garantuar nga gjithë prodhuesit, para institucioneve të kontrollit ushqimor, siç është AKU-ja. Por ne duam që ta ngremë në një shkallë më lart, pra që ta çojmë sigurinë ushqimore, kontrollin e sigurisë ushqimore deri tek konsumatori” tha Peleshi.

Sfida, sipas ministrit, është tek dhjetëra apo disa qindra përpunues të vegjël, që “rëndom i quajmë baxho, nëpër zonat e largëta, të cilët natyrisht janë larg standardit”. “Nuk janë të pashpresë, nuk dua të fus në merak askënd, por duhet të jenë më të vëmendshëm, ndaj është dhe ky aksion, apo kjo reformë, paketë masash. Duhet të jenë më të vëmendshëm për të aplikuar në kushtet e tyre standardet e domosdoshme, për të garantuar qumësht cilësor. Ne e kemi tejkaluar sfidën, për të garantuar qumësht nga kompanitë e mëdha. Pra, qumësht të pastër dhe sipas standardeve të kërkuara” tha Peleshi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.