Peleshi në Agjencinë e NATO-s: Reformojnë tërësisht praktikën e prokurimeve në FA!
Prokurimet më domethënëse të Forcave të Armatosura shqiptare për mjete, pajisje, armatim dhe shërbime do të kryhen nga Agjencia e NATO për Mbështetjen dhe Prokurimet (NSPA), ka bërë me dije Ministri i Mbrojtjes Niko Peleshi.
Sipas informacionit të publikuar në faqen zyrtare prokurimet nëpërmjet NSPA do të garantojnë, jo vetëm ekspertizë më të madhe në hartimin dhe zbatimin e kontratave, por edhe çmime më të mira, duke qenë se kjo agjenci ka një fluks shumë herë më të lartë në marrjen e shërbimeve dhe blerjen e pajisjeve nga operatorët më të mëdhenj globalë që operojnë në fushën e sigurisë dhe mbrojtjes.
Ministri i Mbrojtjes Niko Peleshi zhvilloi një vizitë në selinë e kësaj agjencie në Luksemburg, ku u prit nga menaxherja e Përgjithshme, Stacy Cummings gjatë të cilit u diskutua mbi mundësi të reja bashkëpunimi me NSPA, ku ndër më kryesoret përmendi vijimin e bashkëpunimit për mirëmbajtjen e helikopterëve të flotës ajrore të FARSH; mundësi mbështetje për sistemin e Ermergjencave Civile të vendit tonë; realizimin e projektit për kompletimin e FARSH me spital fushor Role-2, si dhe sigurimin e transportit strategjik për efektivë të FARSH të angazhuar në misione dhe operacione të ndryshme.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.