Pemët e dëmtuara te Liqeni – Bashkia nis zëvendësimin me fidanë të rinj

Bashkia e Tiranës po zëvendëson me pemë të reja të gjitha pemët e dëmtuara të Parkut të Madh të Liqenit, duke zgjeruar sipërfaqen e gjelbëruar.

Nënkryetari i Bashkisë së Tiranës, Arbjan Mazniku, theksoi se parku është një hapësirë shumë e rëndësishme për qytetin, i cili ndikon rrënjësisht në cilësinë e jetës së qytetarëve, ndaj edhe zëvendësimi i pemëve të dëmtuara me fidanë të rinj është domosdoshmëri.

“Jemi duke pyllëzuar një pjesë të parkut të liqenit, e cila ka qenë me pemë të dëmtuara dhe mbushjet e tilla kanë vijuar gjatë gjithë kësaj kohe, do të vijojnë në të gjithë hapësirën e parkut për ta pyllëzuar thellësisht. Ne duam ta kthejmë atë në një hapësirë të gjallë në secilën prej pjesëve të tij, bashkë me investimet e tjera në park, shtimin e rrugëve për këmbësorët, shtimin e një korsie për biçikletat dhe shtimin e një korsie të mirëfilltë për vrapin“, u shpreh Mazniku.

Nënkryetari Mazniku garantoi se në çdo investim publik të Bashkisë së Tiranës është punuar për mbjelljen e pemëve të reja dhe shtimin e hapësirave të gjelbra. Njëkohësisht në këtë drejtim po investohet edhe në parqe të tjera të kryeqytetit.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.