Pension kanadez për shqiptarët – Denaj: 70 mijë shtetas do të përfitojnë nga marrëveshja
Ministrja e Financave dhe Ekonomisë, Anila Denaj, prezantoi sot në parlament projektligjin “Për ratifikimin e Marrëveshjes për Mbrojtjen Shoqërore ndërmjet Shqipërisë dhe Kanadasë”.
Në fjalën e saj, Ministrja Denaj tha se marrëveshja është arritur pas negociatave disa vjeçare mes dy vendeve dhe ratifikimi i saj nga Parlamenti do të krijojë mundësinë e përfitimit të pensioneve për rreth 70 mijë shtetas shqiptarë që jetojnë dhe punojnë në Kanada.
Në bazë të marrëveshjes, theksoi Ministrja, asnjë qytetar shqiptar nuk do të humbasë asnjë ditë kontribute, pavarësisht se ku ka punuar, pasi bashkimi i periudhave do të bëjë të mundur plotësimin e kushteve ligjore për përfitimin e pensionit në të dy vendet.
“Pjesë e kësaj marrëveshjeje është edhe eksporti i pensioneve, që do të thotë që pensioni do t’ju paguhet qytetarëve shqiptarë në vendin që do të zgjedhin të jetojnë.”, tha ajo.
Kështu, shtetasit shqiptarë do të kenë mundësi që të marrin pensionin kanadez edhe nëse zgjedhin të jetojnë në Shqipëri, duke mos humbur asnjë të drejtë, u shpreh Ministrja.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.