Pensionet e ushtarakëve, si do të bëhet rillogaritja? Zbardhet padia në Kushtetuese, argumentet e shoqatave kundër vendimit unifikues

Ish-ushtarakët nuk pajtohen me vendimin e Gjykatës së Lartë, e cila e riktheu në fuqi skemën për llogaritjen e pensioneve të parakohshme mbi bazën e ligjit të 2009-s.

Shoqatat argumentojnë se nga aplikimi i kësaj formule do të krijohen debitorë të rinj në radhët e ushtarakëve në pension, të cilët kanë fituar gjyqin apo janë ende në proces gjyqësor.

Ligji i miratuar në 2009-n, konkretisht neni 29 i tij, përcakton mënyrën e llogaritjes për pensionet e parakohshme.

Kështu përfitojnë pensionin e parakohshëm për vjetërsi shërbimi ushtarak që plotësojnë vjetërsinë e shërbimit, përkatësisht 12 vjet për gratë dhe 15 vjet për burrat, dhe që kanë mbushur moshën: gratë 42 vjeç dhe burrat 47 vjeç.

Masa e përfitimit llogaritet: 50 % e pagës referuese, mbi të cilën është derdhur kontributi dhe për çdo vit tjetër të vjetërsisë së shërbimit mbi 12 vjet për gratë dhe 15 vjet për burrat masa shtohet me 2 % të pagës referuese, raporton Panorama.

Por masa e përgjithshme e pensionit të parakohshëm nuk mund të kalojë masën e pensionit maksimal të pleqërisë në shkallë vendi.

Pas indeksimit me 3 % që ka hyrë në fuqi që nga muaji mars i këtij viti, pensioni maksimal nga 25.270 lekë është bërë 26.028 lekë.

“Kjo skemë kontestohet nga shoqatat e ish ushtarakëve. “Kolegjet e Bashkuara nëpërmjet këtij vendimi unifikues e kanë futur llogaritjen e pensionit të parakohshëm në një rrugë në kundërshtim me ligjin  dhe Kushtetutën me synim të qartë për të goditur ekonomikisht dhe moralisht ushtarakët në një kohë që ligji, me gjithë përpjekjet e shumta që janë bërë kundër ushtarakëve ka ruajtur elementet kryesore të tij në mbrojtje të tyre”, thuhet në padinë e dorëzuar në Gjykatën Kushtetuese.

Ish-ushtarakët, zbardhet padia në Kushtetuese. Argumentet e shoqatave kundër vendimit unifikues

Zbardhet kërkesë- padia që ushtarakët kanë dorëzuar në gjykatën Kushtetuese për të kundërshtuar vendimin unifikues të marrë nga Kolegjet e Bashkuara të Gjykatës së Lartë në prill të këtij viti.

Me argumentin se vendim cenon hapur dhe rëndë të drejtat e fituara me ligj, Shoqata e Ushtarakëve në Rezervë dhe Shoqata e Punonjësve të policisë së shtetit kanë kërkuar nga Kushtetuesja pezullimin dhe shfuqizimin e tij, raporton Gazeta “Panorama”.

Një grup i posaçëm pune, i drejtuar nga kreu i AKUSH, Kujtim Çako ka hartuar padinë në të cilën janë përvijuar të gjitha kundërshtitë të cilat kanë si pikënisje efektet e mundshme që pritet të rrjedhin nga vendimi. Skema e lënë në fuqi për rillogaritjen e pensioneve është kontestuar fort duke qenë se krijon premisat për krijimin e debitorëve të rinj në radhët e ish ushtarakëve që kanë dalë në pension të parakohshëm. Janë rreth 4 mijë persona që kanë fituar gjyqin apo janë ende në proces që preken nga vendimi, të cilët do të detyrohen t’i kthejnë shtetit shuma që variojnë nga 2 mln deri në 37 milionë lekë të vjetra.  Bëhet fjalë për të gjithë ata që e drejta e përfitimit të pensionit të parakohshëm ka lindur prej datës 1 janar 1999 deri me hyrjen në fuqi të ligjit 1042 në 2009, por pensioni nuk është caktuar ende.

“Gjykata e Lartë ka vendosur të kthejë  në debitorë të gjithë ushtarakët të cilëve, pasi në zbatim të vendim kthehen në rigjykim çështjet e tyre nga Kolegji Administrativ në Apelin Administrativ të kthehen në shkallën e parë Administrative me synimin e qartë rrëzimin e padive të ushtarakëve. Kjo është një masakër e vërtetë sepse me këtë vendim unifikues përkeqësohet situata e ushtarakëve. Nga njëra anë, qeveria eliminon debitorët  me argumentin se është zbatuar keq ligji nr.10142/2009 i ndryshuar, kurse Gjykata e Lartë tenton të krijojë përsëri debitorë të rinj, duke iu kundërvënë hapur Kuvendit dhe qeverisë” thuhet në padi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.