Pensionet “hanë” 29 mld lekë – Më shumë përfitues, rritet deficiti
Rreth 29 miliardë lekë të taksapagueseve shqiptarë shkojnë për të mbuluar gropën e pensioneve.
Referuar raportit zyrtar të Institutit të Sigurimeve Shoqërore për vitin 2018, vihet re se të ardhurat për vitin që lamë pas janë regjistruar në vlerën e 91.6 miliardë lekëve, ndërsa shpenzimet janë regjistruar në vlerën e 120.6 miliardë lekëve, çka bën që deficiti prej 29 miliardë lekësh që nevojitet për mirëfunksionimin e skemës, të subvencionohet nga buxheti i shtetit.
Krahasimisht me vitin 2017, të ardhurat dhe shpenzimet në skemën e pensioneve janë rritur njëkohësisht dhe po ashtu, edhe deficitit në rreth 1.9 miliardë lekë. Ndërkaq, gjatë vitit që lamë pas, skemës së kontributeve shoqërore u janë shtuar rreth 26.727 kontribues, duke arritur në një total prej 778,111. Po ta analizojmë nga viti 2012, skemës së pensioneve i janë shtuar më shumës e 126 mijë kontribues.
Me të njëjtin ritëm është zgjeruar edhe numri i përfituesve, ku gjatë 2018 kanë marrë pension 635,735 individë, ku përfshihen pensionet e pleqërisë, invaliditetit dhe pensionet familjare, të ndara sipas kategorive rurale dhe urbane, apo 14.549 përfitues më shumë se në vitin 2017.
Prej vitesh skema e pensioneve në Shqipëri është deficitare, megjithatë ky raport ka ardhur në ngushtim nga vitit në vit, pas reformimit të saj dhe aksioneve anti informalitet.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.