Pensionet private – Kontribuesit arrijnë në mbi 20 mijë
Numri i kontribuesve në fondet private të pensioneve po rritet me ritme të kënaqshme gjatë këtij viti. Sipas të dhënave nga Autoriteti i Mbikëqyrjes Financiare, numri i anëtarëve në fund të muajit shtator arriti në më shumë se 20 mijë.
Që nga fillimi i vitit, numri i kontribuesve është shtuar me rreth tre mijë individë ose 17%. Rritja e numrit të anëtarëve po udhëhiqet sidomos nga fondi SiCRED Pension, që po ndjek një strategji mjaft aktive të promovimit të përfitimeve nga fondet private të pensioneve, edhe përmes rrjetit të kompanisë mëmë, Credins Bank. SiCRED Pensions ka arritur në afro 11,500 mijë kontribues dhe mban rreth 57% të tregut, sipas numrit të anëtarëve.
Në volum, tregu ende ngelet në përmasa modeste, por me rritje të qëndrueshme nga viti në vit. Totali i aktiveve të fondeve të pensioneve në fund të muajit shtator arriti në 1.6 miliardë lekë, me një rritje prej 21% që nga fillimi i vitit.
Kontributet në fondet e pensioneve private investohen pothuajse tërësisht në bono dhe obligacione të qeverisë shqiptare, me një rrezik investimi 0. Për nga totali i aktiveve, kompania më e madhe është Sigal Pensions, me afro 50% të tregut.
Mjedisi me norma të ulëta interesi është një faktor që ka nxitur rritjen e këtyre fondeve. Depozitat bankare dhe bonot e thesarit ofrojnë kthime shumë të ulëta, ndaj shumë individë kanë vlerësuar si një alternativë interesante investimin e kursimeve në një pension privat.
Duke investuar në një pension vullnetar individët gjithashtu mund të përfitojnë një zbritje nga taksat. Sipas ligjit, këto kontribute përjashtohen nga tatimi mbi të ardhurat personale deri në masën e 15% të të ardhurave vjetore bruto, por jo më shumë se 200 mijë lekë në vit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.