Pensionistët në protestë – Greqi, kërkojnë nga gjykata që të rrëzojë shkurtimet
Qindra pensionistë grek kanë dalë sërish nëpër rrugët e Athinës për të protestuar shkurtimin e thellë të pensioneve.
Kësaj radhe, protestat janë zhvendosur përballë godinës së gjykatës administrative, si shpresa e vetme e mbetur. Greqia së fundmi ka kaluar një reformë të re pensionesh, duke shkurtuar thellësisht përfitimet monetare të pensionistëve, për hir të programit të tretë të shpëtimit me kreditorët ndërkombëtarë.
Që prej vitit 2010, kur Greqia u vu nën tutelën e kreditorëve, pensionistëve i`u janë shkurtuar përfitimet më shumë se 10 herë. Së fundmi, ata i janë drejtuar Këshillit të Shtetit në Athinë, që është edhe organi më i lartë i gjykatës administrative, me shpresën se kësaj here do të fitojnë.
Masat e reja shtrënguese për pensionet nuk kanë hyrë ende në fuqi, por do të hyjnë në vitin 2019. Pensionistët protestojnë me sloganin: merrjani paratë atyre që kanë, jo pensionistëve.
Ata presin që gjykata t`i shpallë masat e qeverisë jokushtetuese, paçka se, gjasat tregojnë se, gjykata nuk do të marrë asnjë vendim, pasi nuk është aspak në kompetencat e saj.
Për një pjesë të madhe te pensionistëve, deri më tani përfitimet janë shkurtuar deri në masën 50% dhe një shkurtim i mëtejshëm do të ishte i papranueshëm.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.