Për pushime në Shqipëri – Rriten numri i shtetasve të huaj me 13.3% në qershor, kryesojnë maqedonasit
Numri i shtetasve shqiptarë dhe të huaj të hyrë në territorin shqiptar gjatë muajit qershor është rritur me 11.7 për qind, krahasuar me të njëjtën periudhë të një viti më parë.
Rritje ka pësuar edhe numri i shtetasve të huaj, kjo shifër është rritur me 13.3 për qind gjatë muajit të fundit, duke e çuar numrin në 496.137 shtetas të huaj. Rritja lidhet edhe me faktin që shumë të huaj zgjedhin Shqipërinë si destinacion për pushimet verore. Kështu 27 për qind e tyre kanë hyrë në vendin tonë për pushime, ndërsa 38.5 për qind e tyre kanë zhvilluar vetëm vizita ditore.
Sipas raportit të INSTAT në muajin qershor ndër vendet që kanë hyrjet më të larta të shtetasve në Shqipëri, është Maqedonia me rritjen më të madhe me 58,3 për qind, ndërsa uljen më të madhe e kanë patur shtetasit nga Anglia me 10,9 për qind.
Nëse këtë shifër e llogarisim në total të gjashtë muajve të parë të vitit, shtetasit nga Polonia kryesojnë, me rritjen më të madhe prej 26.4 për qind. Numri i shtetasve të huaj të hyrë në vendin tonë në gjashtëmujorin e parë 2018 është 1.919.504 duke u rritur me 9,1 %, në krahasim me të njëjtën periudhë të vitit 2017.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.