Përdorimi i celularit – 172 minuta në muaj për tremujorin III
Shqiptarët folën mesatarisht 172 minuta në muaj me telefonin e tyre celular në tremujorin e tretë të këtij viti. Sipas të dhënave nga Autoriteti i Komunikimeve Elektronike dhe Postare, përdorimi mesatar i telefonit celular për thirrje u rrit me 15% krahasuar me të njëjtën periudhë të një viti më parë.
Rritja e përdorimit mesatare po vjen edhe falë rënies graduale të numrave celularë aktivë në përdorim. Për tremujorin e tretë, numri i përdoruesve aktivë ra më tej në 3.29 milionë, 16.2% më pak krahasuar me të njëjtën periudhë të një viti më parë.
Pas ndalimit të diferencimit për thirrjet brenda dhe jashtë rrjetit, gradualisht përdoruesit po heqin dorë nga mbajtja e disa numrave celularë. Mes të tjerash, statistikisht kjo po rezulton në rritje të përdorimit mesatar për numër.
Rritja e përmasave më të mëdha në shërbimet e lëvizshme të komunikimit po vjen pikërisht nga interneti me brez të gjerë, që numëron gati 2.2 milionë përdorues, afro 19% më shumë krahasuar me tremujorin e tretë 2016.
Statistikat tregojnë se një përdorues konsumon mesatarisht 1.91 Gb trafik interneti çdo muaj dhe shifra është në rritje të vazhdueshme që nga fundi i vitit i të kaluar, ku AKEP publikoi për herë të parë të dhëna mbi këtë tregues.
Hyrja e teknologjisë 4G dhe rritja e përdorimit të telefonave smart po e rrit me ritme të shpejta përdorimin e këtij shërbimi nga celularët.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.