Performanca e 59 shoqërive ujësjellëse. Zbardhet raporti: Përmirësohen arkëtimet por ulet në 11.4 orë në ditë koha e furnizimit me ujë
Gjatë vitit 2016 rezulton se kompanitë e ujësjellësit kanë shënuar përkeqësim të disa indikatorëve si mbulimi me shërbimin e furnizimit me ujë, mbulimi me kanalizime apo kohëzgjatja e furnizimit me ujë. Referuar raportit vjetor të Entit Rregullator të Ujit që është depozituar në Kuvend në kuadër të raportimit vjetor të institucioneve, në vitin 2016 konsumatorët janë furnizuar me ujë mesatarisht 11.4 orë në ditë. Krahasuar me vitin 2015 kohëzgjatja mesatare e furnizimit me ujë e përllogaritur është ulur pasi në vitin 2015 kohëzgjatja mesatare ishte 12.1 orë në ditë.
“Krahasuar me një vit më parë treguesi i “mbulimi me ujë” dhe “mbulimi me kanalizime” kanë tendencë negative. Por nëse analizojmë të dhënat rezulton se numri i popullsisë në zonën e juridiksionit dhe numri i popullsisë së shërbyer është rritur. Popullsia në zonën e juridiksionit është rritur me 202’063 banorë, popullsia që faktikisht furnizohet me ujë është rritur me 91’854 banorë, ndërsa popullsia me lidhje në sistemin e kanalizimeve është rritur me 77’858 banorë. Krahasuar me vitin e kaluar duket sikur kemi rënie të përqindjes së popullsisë së shërbyer me furnizimin me ujë dhe me kanalizime, por faktikisht kjo rënie vjen për shkak të rritjes së numrit të popullsisë në juridiksionin e shoqërive UK, por që nuk është shoqëruar me mbulimin me shërbim UK të të gjithë popullsisë së shtuar” shkruhet në raport.
Në vitin 2016, norma mesatare e arkëtimit në sektor është 93%. Tendenca është pozitive. Krahasuar me një vit më parë ky tregues është përmirësuar. Të ardhurat nga arkëtimi në sektor janë rritur me 1 përqind.
Niveli i humbjeve në sektor është 67%, kjo tregon se pjesa më e madhe e ujit të prodhuar humbet, për rrjedhojë jo vetëm nuk gjeneron të ardhura por rrit edhe kostot e shërbimit të furnizimit me ujë. Ky tregues të paktën për në katër vitet e fundit mbetet në nivele jo të mira dhe përbën shqetësimin kryesor në sektor. Fakti që rreth 36% e konsumatorëve i përkasin shërbimit aforfe tregon se niveli i faturimit aforfe për konsumatorët mbetet në nivele të larta.
Krahasuar me vitin 2015 numri i konsumatorëve është rritur me 22 376 lidhje dhe numri i konsumatorëve me matës është rritur me 20513 lidhje.
“Megjithatë, në vitin 2016 numri i shoqërive të cilat kanë instaluar matësit për të gjithë konsumatorët vazhdon të jetë i ulët. Pjesa më e madhe e shoqërive ofron shërbim të matur dhe të pamatur si për klientët familjarë edhe ato jo familjarë, madje ka dhe një numër të kufizuar shoqërish për të cilat shërbimi i matur është në nivel të papërfillshëm. Së pari shoqëritë UK duhet të kishin përfunduar deri në fund të vitit 2010 (bazuar në dy vendime të Këshillit të Ministrave) instalimin e matësve për të gjithë klientët jo familjarë” vijon raporti.
Aktualisht popullsia që mbulohet me shërbimin e furnizimit me ujë nga shoqëritë UK vazhdon të mbetet 79% e popullsisë, ndërsa përsa i përket shërbimit të grumbullimit e largimit të ujërave të ndotura, ai ofrohet nga shoqëritë UK vetëm për 49% të popullsisë, trajtimi i ujërave të ndotura kryhet vetëm për 10 % të popullsisë.
Ndarja e popullsisë së mësipërme sipas qytetit dhe fshatit tregon se mbulimi me shërbimet e ofruara në qytet dhe në fshat është në disnivele të mëdha. Përqindja e mbulimit me shërbimin e furnizimit me ujë në qytet arrin 90% ndërsa në fshat 62,7%. Kjo diferencë thellohet më shumë përsa i përket mbulimit me shërbim me kanalizime, në qytet ky mbulim arrin në vlerën 76,7% ndërsa në fshat është 6,6%. Me shoqëritë UK që janë në proces riorganizimi ky disnivel pritet të përmirësohet ndjeshëm.
Referuar të dhënave të vitit 2016, rezulton se popullsia që faktikisht furnizohet me ujë nga shoqëritë UK në fshat është rritur me rreth 28% krahasuar me vitin 2015. Në sektorin e ujësjellës-kanalizimeve në vend operojnë 59 shoqëri.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.