Performanca e HSBC – Banka më e madhe në Europë dështon të arrijë pritshmëritë
Banka më e madhe tregtare në Europë, HSBC, raportoi rezultatin për tremujorin, ku dështoi të arrijë projeksionet në një periudhë sfiduese që kapi në befasi tregjet botëror.
Fitimi përpara taksave (EBT) për të gjithë 2018-ën arriti në 19.9 miliardë dollarë, në rritje me 15.9% nga viti i kaluar. Të ardhurat nga aktiviteti rezultuan në 53.8 miliardë dollarë, në rritje me 4.5% nga 2017-a. Banka me seli në Londër priste një rritje rekord të fitimit në 21.3 miliardë dollar për 2018-ën dhe të ardhura në 54.7 miliardë dollarë. HSBC deklaroi se do të paguajë një dividend vjetor prej 0.51 dollarë për aksion, por nuk lajmëroi plane të riblerjes së aksioneve, si ç’pritej.
Aksionet e listuara në Hong Kong ranë me 2% pas prezantimit. Marzhi neto i interesave i bankës, tregues i përfitueshmërisë, qëndroi në 1.66% në 31 Dhjetor 2018, në rritje nga 1.63% që ishte vitin e kaluar. Raporti i mjaftueshmërisë së kapitalit (CET1), apo kapitali bazë ndaj aktiveve të ponderuara me risk, qëndroi në 14%, nga 14.5% që ishte në fund të 2017-ës. Pavarësisht se nuk arriti objektivat, banka bëri të ditur se ishte kënaqur me rezultate, pasi mjedisi i tregtimit në tremujorin e katërt ka qenë tejet sfidues. HSBC deklaroi se është përgatitur për të gjitha skenaret e Brexit.
Në lidhje me Azinë, ku banka gjeneron pjesën më të madhe të të ardhurave, kryesisht në Kinë, institucioni bëri të ditur se nuk ka pasur ngadalësim të biznesit për pasojë të luftës tregtare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.