Performanca fiskale në Eurozonë – Borxhi dhe deficiti bien në 2017-ën, ndërkohë që ekonomia rritet
Borxhi dhe deficiti publik i Eurozonës ka rënë vitin e kaluar, sipas zyrës së Statistikave të Bashkimit Europian, ndërkohë që ekonomia e bllokut ka treguar një performancë të fortë. Borxhi në 19 vendet e valutës së përbashkët ra në 86.7% në raport me Produktin e Brendshëm Bruto në 2017-ën, nga 89% që ishte një vit më parë, raporton Eurostat.
Deficiti ra në 0.9% të PBB nga 1.5% që ishte në vitin 2016. Përmirësimi i financave publike pritet të reduktojë kostot e financimit të qeverive. Rënia e hendeqeve në buxhet erdhi pjesërisht prej perfomancës së fortë të ekonomisë së bllokut në vitin e kaluar. Komisioni Europian vlerësoi në projeksionet e fundit një rritje me 2.4%, që është norma më e shpejtë në një dekadë. Greqia, që po i afrohet fundit të programit të 3 të shpëtimit, pati një rënie të lehtë të borxhit në 178.6% të PBB, nga 180.8% që ishte në vitin 2016.
Ndërkohë që borxhi i Athinës vazhdon të jetë më i lartë në Europë, rënia e viteve të fundit konfirmon trendin pozitiv të ekonomisë greke, që regjistroi një suficit në buxhet prej 0.8% të PBB gjatë 2017-ës. Borxhi publik i Italisë, që është i dyti më i madh në rajon, mbeti thuajse i pandryshuar në 131.8% ndaj Produktit të Brendshëm Bruto në vitin e kaluar, nga 132% që ishte në vitin 2016.
Eurostat konfirmoi se Franca ka respektuar rregullat e Bashkimit Europian vitin e kaluar, me një deficit poshtë kufirit prej 3%. Franca regjistroi një deficit prej 2.6%, në rënie nga 3.4% që ishte në vitin 2016, duke sjellë lajme pozitive për presidentin Emmanuel Macron, që mori detyrën në Majin e kaluar. Ekonomia më e madhe e bllokut, Gjermania, ka rritur suficitin buxhetor në 1.3% vitin e kaluar, nga 1% që ishte në 2016-ën. Borxhi i Gjermanisë ra gjithashtu në 64.1%, nga 68.2% të PBB.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.