“Përfshirja e biznesit të vogël në skemën e pagesës së TVSH?”- Basha takime në Kavajë: Ky projekt duhet ndalur
Kryetari i Partisë Demokratike, Lulzim Basha u takua me pronarë dhe të punësuar në biznesin e vogël në Kavajë, të cilët u shprehen kundër futjes së tyre në skemën e pagesës së TVSH, pasi sipas tyre kjo do t’i çojë drejt falimentimit për shkak të rritjes së shpenzimeve.
Përfaqësues të biznesit vogël në këtë qytet u shprehën se futja në skemën e TVSH do t’i detyrojë të rrisin çmimet, gjë që do të thotë se konsumi do bjerë dhe ata do humbin klientelën.
Kreu i PD, Basha gjatë një bisede me pronarin e një picerie tha se ky projekt duhet ndalur:
“Jeni shumicë. Shumica e biznesit është biznes i vogël. Këta janë pakicë, janë pakicë e qeverisë, 20% e shqiptarëve e kanë votuar dhe rritjen e TVSH-së për biznesin e vogël po e bëjnë për hesap të 10 vetave, 10 oligarkëve. Këtu çelësi është bashkimi. Po u bashkuam, këta nuk kanë çfarë të na bëjnë. Do të detyrohen të zmbrapsen”, thotë Basha.
Me një tjetër sipërmarrës, Basha u shpreh se kërkesa që ai ka bërë është se biznesi nën 12 milionë lekë të reja për vit, të mos paguajë fare TVSH.
“Ne duam që biznesi nën 12 milionë lek të reja për vit të mos paguajë fare TVSH. Vër pullën tek dera, punoni, t’i shërbeni njerëzve, mallrat e konsumit t’i shisni me çmime të arsyeshme dhe të nxirrni bukën e gojës, sepse vetëm për bukën e gojës punoni apo jo?”
os.de/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.