Përfshirja financiare në Shqipëri, BB: 40% me llogari, norma më e ulët në Europë, shkak pabarazia
Në Shqipëri vetëm 40% e popullsisë së rritur ka një llogari bankare. Kjo është norma më e ulët në rajon, pasi për vende si Maqedonia, Mali i Zi apo Serbia norma ngjitet edhe përtej 70%.
Madje, kjo është norma më e ulët në Europë, thotë një raport i sapopublikuar nga Banka Botërore që merr ne analizë përfshirjen financiare.
Disa vende europiane të zhvilluara, si, Suedia, Norvegjia apo Holanda sa për të përmendur disa prej tyre e kanë një normë të tillë në 100%.
E ndërkohë që kjo shifër në vetvete është shqetësuese një tjetër e dhënë që del në pah nga raporti është edhe më shqetësuese, pasi tregon se përfshirja financiare është diskriminuese.
Hendeku mes të pasurve dhe të varfërve sa i përket pasjes së një llogarie fiksohet në 29%, norma e tretë më e lartë në të gjithë globin, pas Rumanisë dhe Ekuadorit.
Kjo do të thotë se, në pjesën dërrmuese, ata që nuk kanë një llogari bankare dhe që vetëpërjashtohen kështu nga shërbimet financiare janë pjesa më e varfër e popullsisë. Paçka se kjo nuk do shumë mend të deduktohet, hendeku prej 29% mes të pasurve dhe të varfërve është realisht alarmant.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.