Përfundon kriza politike në Bullgari – Kush është Kiril Petkov, kryeministri i ri që do të luftojë korrupsionin?!
Parlamenti i Bullgarisë ka votuar zyrtarisht për të zgjedhur Kiril Petkov si kryeministër të ardhshëm të vendit, duke i dhënë fund një krize politike prej disa muajsh. Deputetët zgjodhën udhëheqësin 41-vjeçar të qendrës me 134 vota kundrejt 104 kundër gjatë një seance të hënën.
Në një votim të veçantë, ligjvënësit miratuan gjithashtu qeverinë e re të vendit të udhëhequr nga qendra – një koalicion i udhëhequr nga partia anti-korrupsion e Petkov, ‘Ne Vazhdojmë Ndryshojmë’ (PP) dhe tre grupe politike.
PP, Partia Socialiste Bullgare e krahut të majtë, partia kundër elitës ‘Ka një popull të tillë’ dhe grupi liberal, Bullgaria Demokratike, së bashku kontrollojnë 134 vende në parlamentin 240 vendesh të Bullgarisë. Vendi ka duruar tetë muaj ngecje politike duke përfshirë tre zgjedhje të përgjithshme.
Në votimin e fundit në nëntor, partia PP e Petkov doli si fituese e befasishme ndaj partisë konservatore GERB, e cila dominoi politikën bullgare në dekadën e fundit. Petkov – një sipërmarrës i shkolluar në Harvard – ka shërbyer më parë si ministër i ekonomisë në qeverinë e përkohshme të Bullgarisë.
Të hënën, ai njoftoi se transparenca në shpenzimet publike, zero toleranca për korrupsionin dhe reformat në gjyqësor do të jenë gurët kyç të kabinetit të tij. Petkov u zotua gjithashtu të mbajë Bullgarinë në një rrugë pro-europiane dhe pro-NATO-s.
Prioritete të tjera të qeverisë së re përfshijnë trajtimin e krizës demografike, rritjen e kostos së jetesës dhe shkallën e ngadaltë të vaksinimit kundër COVID-19. Më pak se 30 % e popullsisë së rritur të Bullgarisë janë vaksinuar plotësisht kundër koronavirusit – shkalla më e ulët në Bashkimin Europian.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.