Përfundon rikonstruksioni i rrugës që të çon në plazhin e Spillesë – Përfitojnë 3000 banorë nga investimi
Ka përfunduar rikonstruksioni i plotë i rrugës “Ura e Çorumit-Zhabiak-Ura e Çepanit”, një aks që lidhet me rrugën e Kryevidhit që të çon në plazhin e Spillesë. Janë rreth 3 mijë banorë të Njësisë Administrative Kryevidh në Bashkinë Rrogozhinë që përfitojnë nga ky investim i zbatuar nga Fondi Shqiptar i Zhvillimit.
Sipas këtij të fundit, segmenti rrugor me gjatësi 6.3 kilometra shtrihet nga ura e Çepanit ku degëzon rruga për në Kryevidh dhe vazhdon përgjatë kanalit, duke kaluar përmes Zhabiakut, për të përfunduar në Urën e Çorumit.
Ky investim së bashku me rikonstruksionin e tre rrugëve hyrëse në qytetin e Rrogozhinës dhe rrugës Gërmenj-Okshtu-Zambishtë, janë edhe ndërhyrjet më të fundit të kryera në Bashkinë Rrogozhinë nga FSHZH-ja.
Rruga ishte tejet e amortizuar, pa ndriçim, trotuarë dhe kanalizime të ujrave të bardha në zonën urbane.
Aksi i ri lidhet me rrugën e Kryevidhit që të çon në plazhin e Spillesë, mjaft i frekuentuar gjatë sezonit veror.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.