Përfundon rindërtimi i rrugës së Kalasë në Berat – Rama: Program i veçantë financimi edhe për ‘rilindjen’ e shtëpive

Ka përfunduar rindërtimi i rrugës së Kalasë në qytetin e Beratit. Rruga që mban emrin “Mihal Komneno”, është hyrja kryesore dhe aksesi më i shkurtër që lidh Beratin me një ndër lagjet muzeale të qytetit, lagjen ‘Kala’.

Ndërsa ka përshkruar rrugën e re prej kalldrëmi, kryeministri Edi Rama, i shoqëruar nga ministrja e Kulturës, Elva Margariti dhe ministri i Turizmit dhe Mjedisit, Blendi Klosi e ka vlerësuar këtë si një nga ndërhyrjet më cilësore që kthen në identitet një nga zonat më të frekuentuara nga turistët, numri i të cilëve është gjithmonë në rritje në Berat.

Ndërkohë, ka njoftuar më tej propozimin e qeverisë për një program financimi të posaçëm për restaurimin e shtëpive si dhe atyre tradicionale të Gjirokastrës dhe të Beratit.

“Ne duam të bëjmë një program të veçantë, program rilindjeje të shtëpive të Gjirokastrës dhe të Beratit, si dhe të shtëpive tradicionale me vlerë si monument kulture në zona të tjera turistike, një program financimi ku t’iu jepet akses atyre që marrin këto iniciativa dhe t’iu lehtësohet nga pikëpamja e financimit i gjithë procesi. Mund të jenë fonde grant, mund të jenë fonde me kredi me interesa shumë të ulëta”, tha kryeministri Rama.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.