Përgjegjësia sociale – ABI Bank, mbështetje për shtresat në nevojë
Shumë institucione private tashmë e kanë kthyer në prioritet mbështetjen sociale. Kështu Banka amerikane e Investimeve, ABI Bank kontribuoi nëpërmjet programeve të saj të mbështetjes sociale në Qendrën Sociale nr. 6 në kryeqytet, në kuadër të Ditës së Falënderimeve. Përfaqësuesja e ABI Bank, Sonila Beqari u shpreh se tashmë mbështetja sociale është ndër shtyllat kryesore të këtij institucioni.
“Për Bankën Amerikane kjo është një ditë shumë e rëndësishme, është një ditë që përputh si traditën amerikane, ashtu edhe traditën e kombit shqiptar, mikpritjen e kombit shqiptar. Kështu që është një ditë kulmore në kuadër të përgjegjësisë sociale, kemi ardhur për të organizuar këtë aktivitet. Do jetë një traditë të cilën ne kemi synim ta bëjmë çdo vit”, u shpreh Beqari, përfaqësuesja e ABI Bank.
I pranishëm në ceremoni ishte dhe Kryetari i Bashkisë së Tiranës, Erion Veliaj, i cili vlerësoi kontributin e institucioneve private, të cilat tashmë gjithnjë e me shume po bëhen pjesë e mbështetjes komunitare.
“Kjo është një festë ku të gjitha familjet mblidhen, ku kalojmë kohë me njëri-tjetrin, ku japim mirënjohje për gjëra që kanë ecur mirë, për shoqërinë që kemi me njëri tjetrin. Për çfarë na ka dhënë zoti, për çfarë na ka dhënë shoqëria, për çfarë na kanë dhënë të afërmit. Dhe unë besoj që ne shqiptarët nëse e mësuam të themi faleminderit e të jemi mirënjohës mirë në bën se nuk është se e themi shpesh. Dhe kjo është një mundësi që dhe ne t’ju themi faleminderit juve se dhe kjo punë nuk bëhet nëse nuk bashkëpunojmë dhe një nga arsyet pse kjo qendër sociale është kaq model është sepse ne të gjithë bashkëpunojmë”, tha Veliaj.
Dita e Falënderimeve ka mbledhur në këtë qendër sociale dhe përfaqësues të Dhomës Amerikane të Tregtisë dhe Këshillit Rinor të Ambasadës Amerikane.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.