Përhapja e infeksionit Covid-19, Basha: “Vendi është në humnerë, Rama përgjegjës për jetët e humbura”
Kreu i Partisë Demokratike, Lulzim Basha ka bërë përgjegjëse qeverinë për përhapjen e infeksionit dhe humbjen e jetëve nga Covid-19. Sipas Bashës mungesa e manaxhimit duke mos siguruar tamponët, vaksinat e gripit apo dhe duke mos hapur spitalet, e ka rënduar situatën për të cilën shtoi se është akoma edhe më e rëndë sa i takon numrit të të infektuarve.
“Ky është terrorizëm shtetëror. Edi Rama është në krye të një terrorizmi shtetëror me anë të cilit po vret njerëz dhe po i sëmur ata. Pasi paratë për të ndihmuar dhe mjekuar po ia jep mafies së plehrave. Jeta e humbur e këtyre pacientëve është drejtpërdrejtë përgjegjësi e Edi Ramës. Përgjegjësi morale, politike dhe ligjore.” – u shpreh kryetari i PD.
Basha u ndal te 4 hapat e kërkuara prej javësh nga Partia Demokratike, që sipas tij do të frenonin përkeqësimin e gjendjes shëndetësore dhe ekonomike në vend.
“Ku është bonusi për mjekët dhe infermierë dhe futja në betejë edhe e mjekëve të familjes edhe spitalet rajonale, por edhe Qendrat e tjera Shëndetësore, përveç se duke i përgatitur, duke i paguar, duke i mbrojtur, dhe duke i dhënë mundësinë për të bërë detyrën e tyre, duke rritur numrin e testimeve pasi si mund të ndiqet ndryshe zinxhiri i infeksioneve.
Prej katër javësh i kërkoj të rimbursojë paketën e ilaçeve për të trajtuar Covid dhe i kërkoj të përgatisë të gjithë infrastrukturën shëndetësore për Covid. Asnjë hap nuk ka marrë.” – u shpreh z.Basha.
Kreu demokrat garantoi ndryshimin me ardhjen në pushtet të Partisë Demokratike përmes masave konkrete që sipas tij do të ndalin përhapjen e infeksionit dhe vjedhjen përmes aferave korruptive që po bënë qeveria aktuale.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.