Përhapja e virusit kinez/ Urdhri i Manastirliut: ”S’ka rrezik, por të merren masat përgatitore”
Pas alarmit të krijuar nga virusi vdekjeprurës në Kinë, Ministria e Shëndetësisë thotë se Shqipëria ka rrezik të ulët, por në zbatim të rekomandimeve të Organizatës Botërore të Shëndetësisë, ministrja Ogerta Manastirliu ka nxjerrë një urdhër për marrjen e masave parapërgatitore. Qëllimi I urdhrit është mbrojtja nga depërtimi i koronavirusit të ri, edhe pse sipas OBSH jemi kushtet kur ende nuk ka të dhëna të qarta mbi mënyrën e trasnmetimit nga njeriu tek njeriu.
Sipas urdhrit, ISHP duhet të përforcojë survejancën e infeksioneve të rënda respiratore akute në bashkëpunim me të gjitha spitalet e vendit. Urdhri specifikon që ISHP të përgatisë përkufizimin e rastit, udhëzimet për survejancën, hetimin epidemiologjik dhe menaxhimin e rasteve në përputhje me Rregulloren Ndërkombëtare të Shëndetit. Ndërkohë që, strukturat përgjegjëse duhet të marrin masat për vënien në zbatim të planeve të emergjencës për reagimin ndaj infeksioneve virale, sipas shkallës së rrezikshmërisë. Sa i takon masave që mund të merren në aeroporte, ministria sqaron se ne nuk jemi aeroporti i parë për një fluturim nga Kina, por jemi pjesë e rrjetit, çka do të thotë se nëse ka sinjalizime merren masa.
Ndërkaq, më herët ISHP ka këshilluar të gjithë qytetarët të mbajnë higjienën vetjake, praktikat e higjienës ushqimore, si dhe kur është e mundur shmangia e kontakteve të ngushta me çdo person që shfaq simptoma të sëmundjeve respiratore, si kollë apo teshtitje. Koronaviruset janë familja e viruseve të cilat shkaktojnë sëmundje nga një rrufë e lehtë deri në sëmundje më të rënda respiratore, ndërkohë që koronavriusi në Kinë është një lloj i ri i koronavirusit, i cili nuk është identifikuar më parë tek njerëzit. Shenjat e zakonshme te personat e infektuar përfshijnë simptomat e aparatit të frymëmarrjes: ethe, kollë, gulçim dhe vështirësi në frymëmarrje. Ndërkohë që, në raste më të rënda, infeksioni mund të shkaktojë pneumoni, sindromë të rëndë respiratore akute, insuficiencë të veshkave, madje edhe vdekje.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.