Periudha e tranzicionit për Britaninë – May kundërshton zgjatjen e të drejtave të qytetarëve përtej Marsit 2019

Kryeministrja Theresa May tha se do të kundërshtojë përpjekjet e Bashkimit Europian për të zgjatur kohën e mbrojtjes së qytetarëve deri në vitin 2021, që është vënë kusht për periudhën e tranzicionit për vendin, duke thënë se blloku duhet të respektojë afatin fillestar që është muaji Mars 2019.   Kreu i Ekzekutivit të Britanisë tha se do të ketë ndryshime për shtetasit europianë që shkojnë në Mbretërinë e Bashkuar përpara dhe pas Marsit 2019, ku nis edhe periudha thuajse 2-vjeçare e tranzicionit.

“Kjo është çështje për negociata në lidhje me periudhën e tranzicionit, por jam e qartë se do të ketë kushte të tjera mes atyre që vijnë duke e ditur se Britania nuk është më anëtare e Bashkimit Europian”, tha May.

Negociatat mes Britanisë dhe BE-së mbi periudhën e tranzicionit pritet të nisin së shpejti dhe synohet që të arrihet një marrëveshje deri në fund të muajit Mars.  Vonesa në arritjen e dakordësisë do të ngrinte dyshime te bizneset mbi regjimin ku ato do të operojnë pas daljes nga blloku vitin e ardhshëm.  Të dyja palët ranë dakord mbi disa principe për periudhën e tranzicionit.

Mbretëria e Bashkuar do të humbasë influencën në vendimarrjen e Bashkimit Europian, por nuk do të ketë ndryshime të tjera më të mëdha.  Vendi do të vazhdojë të jetë subjekt i legjislacionit të BE-së dhe do të lejojë qytetarët që të kenë liri të lëvizjes dhe për të punuar në Britani.  Megjithatë, ka kundërshti në lidhje me këto çështje.

“Ne po veprojmë në bazë të votimit të britanikëve. Ata nuk votuan që asgjë të mos ndryshojë dhe gjerat do të jenë ndryshe kur të dalim nga Bashkimi Europian”, tha Theresa May.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.