Përjashtimet nga tarifat e shkollimit – Përfitues edhe ekselentët që zgjedhin mësuesinë
Përcaktohen kategoritë e studentëve të cilët pritet të përjashtohen nga tarifat e studimit në institucionet shtetërore të arsimit të lartë në nivelit bachelor , master por edhe në programet e studimeve profesionale.
Për herë të parë duke filluar që nga ky vit do të përfitojnë arsim falas në universitetet shtetërore edhe ata nxënës ekselentë që plotësojnë kriterin e notës mesatare të viteve të gjimnazit, 9 deri në 10 dhe që kanë zgjedhur degën e mësuesisë për të studiuar.
Këshilli i Ministrave me propozimin e Ministrisë së Arsimit , Rinisë dhe Sportit ka miratuar vendimin për përjashtimin nga tarifat edhe Fëmijët e Policisë së Shtetit, Gardës së republikës, Shërbimit të Kontrollit të Brendshëm, të Policisë së Mbrojtjes nga Zjarri dhe të Shpëtimit, të Forcave të Armatosura, ata të Shërbimit Informativ të Shtetit dhe të Policisë së Burgjeve, që humbin jetën në krye të detyrës apo për shkak të saj.
Përfitues të shkollimit falas në universitetet shtetërore janë edhe fëmijët e personave që kanë statusin e ish të dënuarve dhe të përndjekurve politikë nga sistemi komunist.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.