Përkeqësimi i motit – Reshje intensive e shtrëngata, qarku i Shkodrës në rrezik nga përmbytjet
Reshje të dendura shiu, shtrëngata dhe përmbytje parashikohet të përfshijnë territorin e vendit gjatë pasdites e së sotme e deri në ditët në vijim, 8 dhe 9 mars.
“Sot pasdite (e mërkurë, dt.07) dhe nesër (e enjte, dt.08) në shumicën e qarqeve priten reshje mesatare deri lokalisht intensive, shoqëruar edhe me shtrëngata. Në qarkun e Elbasanit priten reshje intensive, deri lokalisht shumë intensive. Shumica e reshjeve pritet që të bien në mbrëmje dhe gjatë pjesës së parë të ditës së nesërme”, thuhet në njoftimin e IGJEUM.
Gjithashtu pritet prania e reshjeve në formë dëbore në 1.000 m mbi nivelin e detit, kryesisht në veri dhe veri-lindje të vendit.
Sipas llogaritjeve hidrologjike të Institutit të Gjeoshkencave për shkak të prurjeve të larta të lumenjve lumenjtë Drin, Buna dhe Liqeni i Shkodrës, ditën e enjte është paralajmëruar të këtë përmbytje në qytetin e Shkodrës. Kjo për shkak të kombinimit të shkrirjes së dëborës si pasojë e rritjes së temperaturave dhe reshjeve të rëna në pjesët malore të basenit.
“Sot (e mërkurë, dt.07) dhe në vazhdim përgjatë datave 8 dhe 9 Mars 2018 në basenin Drin-Buna dhe Liqeni i Shkodrës do të vazhdojë rritja e niveleve për shkak të ardhjes së prurjeve nga pjesët e larta malore në drejtim të pjesës fushore të basenit. Rritja e niveleve në pjesën e Ultësirës së Shkodrës do të varet edhe nga shkarkimet e kaskadës në Lumin Drin. Paraprakisht, nga llogaritjet hidrologjike të IGJEUM në pjesën e Lumit Buna dhe Liqenit të Shkodrës, do të vazhdojë zgjerimi i hartës së përmbytjeve. Nivelet më të larta janë llogaritur të arrihen ditën e Enjte, 8 Mars 2018. Për arsye të rritjes së rrezikut nga përmbytja është vendosur shenja e paralajmërimit nga përmbytja për qarkun e Shkodrës”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.