Përkeqësohet demokracia në Shqipëri – “The Economist”: Faji është i pjesëmarrjes së dobët. Edhe Ukraina më mirë!

Shqipëria vazhdon të mbetet një demokraci hibride, thotë njësia e inteligjencës së “The Economist”, në raportin më të fundit për demokracinë në botë, ku në analizë merren 167 vende. Ndër to, Shqipëria renditet e 79-ta, tre pozicione më poshtë se një vit më parë, kur renditej në vendin e 76-të. Edhe në pikëzim, vendi ynë ka humbur lehtë pikë.

Krahasuar me vendet e tjera të Europës dhe rajonit, Mali i Zi, Bosnje Hercegovina, Armenia, Moldavia dhe Turqia janë të vetmet vende më keq se ne. Madje edhe Ukraina qëndron një pozicion sipër nesh. Ndër nën-indikatorët, duket se është ai i pjesëmarrjes politike që i jep shuplakën më të rëndë demokracisë shqiptare. Ky indikator është më i dobëti në pikëzim, por edhe ai që ka pësuar rënien më drastike krahasuar me vitin paraardhës. Pjesëmarrja në një sistem demokratik është shtylla kurrizore. Pa të, sistemi është nën kërcënim serioz.

Nën-indikatori me performancën më të mirë ndërkohë, rezulton të jetë ai i lirive civile, i ndjekur nga proceset elektorale.

Nën-indikatori i funksionimit të qeverisë është i vetmi që regjistrion rritje krahasuar me vitin e kaluar. Një tjetër indikator negative dhe që e vendos vendin tonë në pozita aspak të favorshme, sidomos krahasuar me vendet europiane, është ai i kulturës politike. Në nivel global, Norvegjia, Islanda dhe Suedia janë vendet më demokratike në botë, ndërkohë që Shtetet e Bashkuara të Amerikës mbajnë vetëm vendin e 25-të.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.