Përkeqësohet klima e biznesit, Jaço: Më e dobëta në 8 vite, të ri-formatohet sistemi fiskal dhe ligjor
Klima e biznesit në Shqipëri është përkeqësuar ndjeshëm gjatë 2019-ës, duke rezultuar si më e “dobëta” në tetë vitet e fundit. Korrupsioni, konkurrenca e pandershme, klima politike dhe burokracitë kanë bërë që 66 për qind e bizneseve amerikane në vend ta shohin klimën e biznesit të pafavorshme, gjë që ka shkaktuar rënie të indeksi të në 38 pikë nga 43 që ishte në 2018-ën.
“Po të krahasojmë indikatorët e vitit 2018 me ato të 2019 katër nga indikatorë janë përmirësuar ndërsa 23 janë përkeqësuar. Klima politike përbën indikatorin më të rënë të perceptuar nga anëtarët për vitin 2019. Situata në monopolet dhe tregtinë e ndershme ka pasur një rënie të vazhdueshme. Gjetja e stafit të kualifikuar ka qenë gjithashtu një nga problemet kryesore. Performanca ekonomike ka shqetësuar gjithashtu 70% të anëtarëve tanë, ndërsa klima e përgjithshme të biznesit ka pësuar rënien më të madhe gjatë këtyre 8 viteve. ”
Drejtuesi i Dhomës Amerikane të Tregtisë sugjeron një riformatim të sistemit të taksave dhe ndryshime ligjore të kompletuara dhe afatgjata, e qëllim ndaljen e këtij trendi negativ.
“Shumë shpejt do të kemi një raport tjetër dhe mendoj që kemi tre elementë shumë të rëndësishme për të rregulluar në lidhje me legjislacionin, procedurat ose burokracirat e quajtura ndryshe, sistemin e taksave, i cili nuk është më konkurruesi në Ballkan dhe iniciativat që ne mendojmë se duhet t’i rregullojmë për ta bërë më atraktive investimin në Shqipëri.”
E pranishme në konferencë, Ambasadorja e Shteteve të Bashkuara të Amerikës, Yuri Kim, i bëri apel klasës politike të jetë më e përgjegjshme për pasojat në ekonomi dhe të adresohen shqetësimet e ngritura me qëllim rritjen e investimeve.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.