Përkeqësohet “Largimi i trurit” në BE – Lindja “josh” me heqjen e taksës ndaj të ardhurave tek të rinjtë

Vendet e Europës Qendrore dhe Lindore po propozojnë incentiva të mëdha tatimore për të rinjtë,  në përpjekje për të ndaluar largimin e punëtorëve me aftësi drejt shteteve perëndimore.  Largimi i trurit apo “Brain Drain” po cënon perspektivën ekonomike të këtyre vendeve, ndërkohë që të rinjtë kërkojnë për vende pune më të mira.   Kjo ka bërë që qeveria polake të heqë tërësisht tatimin mbi të ardhurat për rreth 2 milionë punëtorë të rinj.   Ligji i ri, që hyri në fuqi në nisje të muajit, projektohet që të rikthejë të rinjtë polakë.

Ndërsa mbështeste ligjin në parlament, Kryeministri Matesz Morawiecki tha se 1.7 milionë njerëz janë larguar nga vendi në 15 vitet e fundit.   “Është si të jetë larguar i gjithë qyteti i Varshavës”, tha Kryeministri duke e përshkruar rënien demografike si një humbje gjigante.   Qytetarët polakë, nën moshën e 26 vjetëve që fitojnë më pak se 22,207 dollarë në vit, do të përjashtohen nga tatimi mbi të ardhurat.   Paga mesatare është rreth 15,500 dollarë, c’ka tregon se tavani është relativisht i lartë për të rinjtë polakë.   Kroacia ka propozuar gjithashtu heqjen e taksës ndaj të ardhurave për personat deri në 25 vjet dhe ta përgjysmojë për ata mes 25-30 vjeç.

Megjithatë, sipas analistëve, është e vështirë që një lehtësim tatimor i tillë të ndalojë fenomenin e largimit të trurit.   Sipas një raporti të BE, në vitin 2017 thuajse 17 milionë njerëz brenda unionit, ku 32% i përkisnin grupmoshës 15-34 vjeç,  janë zhvendosur në një shtet tjetër europian. Gjermania dhe Mbretëria e Bashkuar kanë qenë 2 destinacionet kryesore për europianët e rinj, ndërsa vendet kryesore të origjinës kanë qenë Rumania, Polonia, Italia dhe Portugalia.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.