Përkeqësohet niveli i lirive në Shqipëri – Freedom House: Vendi humbet 1 pikë krahasuar me një vit më parë
Shqipëria ka humbur një pikë në vlerësimin që Freedom House i bën nivelit të lirisë në vend. Raporti më i mirëpranuar në nivel global sa i përket nivelit të lirive i jep Shqipërisë 66 pikë nga 100 të tillë, nga 67 pikë që grumbullonte një vit më parë. Pavarësisht rënies, në rajon Shqipëria qëndron në vend të parë, bashkë me Maqedoninë e Veriut. Në kontinentin e vjetër ndërkohë, Ballkani Perëndimor qëndron pas në renditje krahasuar me vendet e tjera, e sidomos me ato të Bashkimit Europian.
Vetëm vende si Turqia, Rusia, Bjellorusia, Ukraina rezultojnë në nivele më të dobëta të demokracisë. Shqipëria vijon të klasifikohet si një vend pjesërisht i lirë, pa arritur kurrë ta marrë statusin e një vendin plotësisht të plotë. Në rajon, Kosova dhe Serbia janë dy vendet e tjera përveç Shqipërisë që janë përkeqësuar, me një pikëzim në ulje me dy pikë. Maqedonia e Veriut dhe Mali i Zi janë rritur në pikëzim, ndërkohë që Bosnje Hercegovina nuk shënon asnjë ndryshim, vihet re në raportin global të lirive 2021.
Indeksi bazohet mbi dy nën indikatorë kyç, ai i të drejtave politike, ku Shqipëria grumbullon 27 pikë nga 40 të tilla, aq sa një vit më parë, si dhe ai i lirive civile, ku grumbullon 39 pikë nga 60 të tilla, në rënie me 1 pikë krahasuar me një vit më parë, rrjedhojë e disa ngjarjeve përcaktuese të vitit të kaluar.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.