Përllogaritja e akcizës për pijet – Formula për birrën, verën, rakinë, pijet energjike dhe kafen
Në momentin që paguhet akciza për një mall shënohet edhe moment i hedhjes në treg të produktit për konsum. Përllogaritja e akcizës në pije për hektolitër në vendin tonë pësoi një ndryshim në 2016. Në këtë vit u bë rritja e akcizës me 40 lekë për birrën që prodhohet në vend dhe në të njëjtën kohë u ul akciza për birrën e importuar me 110 lekë. Llogaritja e akcizës për pijet për hektolitër ka një formulë specifike.
Kështu referuar birrës nëse është me përqindje alkoolike 4.2 dhe në rastin e prodhuesit nën 200 mijë hektolitër do të kemi: 360/100*4.2 = 15,12 lekë/litër. Në rastin kur kemi një prodhues mbi 200 mijë hektolitër në vit do të kemi një përllogaritje të tillë 710/100*4.2 = 29,82 lekë/litër. Për pijet me përqindje alkoolike 38% akciza për një litër për prodhuesit nënë 20 mijë hektolitër në vit do të jetë 247 lekë/litër.
Ndërsa për prodhuesit mbi 20 mijë hektolitër pagesa do të jetë 321 lekë për litër. Për verën me 12.5% alkoolike akciza për një litër për prodhuesit nën 10 mijë HL do të jetë 30 lekë, ndërsa për prodhuesit mbi 10 mijë HL do të jetë akciza 100 lekë për litër. Kur kemi të bëjmë me verë e cila ka përqindje më të lartë alkooli se 12.5 edhe vlera e akcizës do të jetë më e lartë. Respektivisht 40 lekë dhe 120 lekë për litër.
Për rakinë me 40% alkool akciza është 80 lekë për litër. Ndërsa akciza për pijet energjike do të jetë 30 lekë për litër. Edhe për kafen aplikohet akcizë, por kjo akcizë aplikohet vetëm për kafen e pjekur dhe është 60 lekë/kg.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.