Përmbaruesit shtetërorë pa njohuritë e nevojshme – Drafti, për konsultim: Vonesa të mëdha me ekzekutimet, janë punësuar me 3 muaj provë

Pas Përmbaruesve Privatë, Ministria e Drejtësisë ka arritur në përfundimin se duhet reformuar edhe shërbimi shtetëror i përmbarimit, i cili, sipas saj shfaq mangësi të dukshme. Shkak për të cilin ajo ka miratuar një seri ndryshimesh në Ligjin për shërbimin e përmbarimit shtetëror.

Në analizën që i bën këtij sektori, Ministria evidenton se ka mangësi në shërbimin përmbarimor gjyqësor shtetëror dhe privat, zgjatje të pajustifikuara në ekzekutimin e titujve ekzekutivë, mungesë transparence dhe përkushtimi në ushtrimin e detyrave, si dhe vonesa të mëdha në ekzekutim. Veprimtaria e përmbaruesve gjyqësorë nuk karakterizohet nga profesionalizmi dhe paanshmëria në procesin e ekzekutimit të titujve ekzekutivë. Por ndërsa për sektorin privat, rregullimet janë bërë tashmë funksionale, me problem mbeten përmbaruesit privatë.

Problem që nisin që prej fazës së rekrutimit, thekson Ministria e Drejtësisë. Ligji parashikon ndjekjen e “trajnimit profesional”  në varësi të statusit  të tij, “periudhe 3 mujore prove” dhe nëse rezultati i kësaj periudhe prove është pozitiv, ai emërohet përmbarues gjyqësor. Gjatë periudhës së provës, përmbaruesi i emëruar përkohësisht lihet nën kujdesin e një përmbaruesi më me eksperiencë në detyrë.

Gjithashtu, gjatë kësaj periudhe trajnimi është i detyrueshme për përmbaruesin gjyqësor dhe në fund të saj vendoset emërimi përfundimtar ose largimi i tij, nga shërbimi i përmbarimit gjyqësor shtetëror. Por, Kjo periudhë prove është e pamjaftueshme që përmbaruesi gjyqësor shtetëror të fitojë njohuritë dhe eksperiencën bazë për të ushtruar apo t’u përballur me funksionin me përgjegjshmërinë, dhe profesionalizmin që kërkon, thekson Ministria.

Praktika ka evidentuar se procesi i rekrutimit të përmbaruesve gjyqësorë shtetërorë nuk ka rezultuar një proces efikas për shërbimin, kjo për faktin e mospjesëmarrjes së kandidatëve në procedurat konkurruese e për rrjedhojë mosplotësimin e vendeve vakante, kandidatët pjesëmarrës në konkurs kanë qenë me një nivel të pakët njohurish, kandidatët që evidentohen më një nivel të pranueshëm njohurish konkurrojnë për ta patur si eksperiencë pune për të kaluar më pas në një profesion tjetër dhe përmbaruesit e rinj të rekrutuar janë larguar nga detyra me dorëheqje, për shkak të ngarkesës së punës, dinamikës së ekzekutimit të titujve ekzekutivë dhe kohës së pamjaftueshme për të fituar njohuritë dhe eksperiencën për tu përballur me përgjegjësinë e funksionit të përmbaruesit gjyqësor si subjekt i marrëdhënies juridike civile.

Ndërkohë që Ligji do të rishikojë edhe trajtimin e tyre me pagë, ndërkohë që rregullon edhe masat disiplinore që do aplikohen ndaj tyre për shkelje apo mangësi në kryerjen e detyrës.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.